अतिवृष्टीमुळे सोयाबीन भुईसपाट, ऑक्टोबरमध्ये दर कडाडणार का? मार्केटमधून मोठी अपडेट आली समोर

सन २०२५-२६ हंगामासाठी केंद्र सरकारने सोयाबीनची किमान आधारभूत किंमत (MSP) ५३२८ रुपये प्रति क्विंटल निश्चित केली आहे. मात्र बाजारात शेतकऱ्यांना मिळणारे प्रत्यक्ष भाव यापेक्षा कमी आहेत. मागील काही वर्षांचा विचार केला तर ऑक्टोबर २०२२ मध्ये सरासरी भाव ५०७१ रुपये, ऑक्टोबर २०२३ मध्ये ४६६० रुपये आणि ऑक्टोबर २०२४ मध्ये फक्त ४३६९ रुपये प्रति क्विंटल एवढे दर शेतकऱ्यांना मिळाले होते.

सध्या सुरु असलेल्या ऑक्टोबर २०२५ मध्ये सोयाबीनचे भाव ४५१५ रुपये ते ४८९५ रुपये प्रति क्विंटल या दरम्यान राहतील, असा अंदाज बाजार समित्यांनी व्यक्त केला आहे. म्हणजेच शेतकऱ्यांना अजूनही एमएसपीपर्यंत पोहोचणारा दर मिळण्याची शक्यता कमीच आहे.

भारतातील सोयाबीन उत्पादनावर हवामानाचा मोठा परिणाम झाला आहे. सन २०२५-२६ मध्ये सोयाबीनचे उत्पादन सुमारे ११६ लाख टन होईल, असा अंदाज वर्तवण्यात आला आहे. हे उत्पादन मागील वर्षाच्या तुलनेत जवळपास ८ टक्क्यांनी कमी आहे. सप्टेंबर महिन्यात बाजारात झालेली सोयाबीनची आवकही कमी दिसून आली आहे, ज्याचा परिणाम दरांवर होण्याची शक्यता आहे.

सोयाबीनपासून तयार होणाऱ्या सोयामीलच्या निर्यातीतही घट नोंदवली गेली आहे. सन २०२३-२४ मध्ये भारतातून १९.७ लाख टन सोयामील निर्यात झाली होती, तर सन २०२४-२५ मध्ये ही आकडेवारी घसरून १८ लाख टनांवर आली आहे. जागतिक बाजारातील स्पर्धा आणि दरातील अस्थिरता यामुळे निर्यात कमी झाल्याचे तज्ज्ञ सांगतात.

सध्या शेतकरी अतिवृष्टीमुळे आधीच संकटात आहेत. त्यातच बाजारभावाने समाधानकारक दर मिळत नसल्यामुळे त्यांची अडचण वाढली आहे. केंद्र आणि राज्य सरकारकडून मदत मिळण्याच्या अपेक्षा शेतकरी व्यक्त करत आहेत.