Success Story : मराठवाड्यातील 2 भावांची कमाल, 10 गुंठ्यात केली स्ट्रॉबेरी शेती, 3 महिन्यांत 2 लाख कमाई

फुलंब्रीच्या बोरगाव अर्ज गावातील प्रगतशील शेतकरी गणेश बलांडे आणि गणेश बलांडे हे दोघे भाऊ मोबाईल पहात असताना अचानक स्ट्रॉबेरीची जाहिरात आली. ती जाहिरात पाहून आपणही स्ट्रॉबेरी पीक घ्यावं, असा विचार आला की महाबळेश्वर सारख्या ठिकाणी उत्पादन निघते तर मराठवाड्यात आपणही घेऊन बघण्याची कल्पना सुचली आणि महाबळेश्वरचे मित्र सतीश भापकर यांच्याशी संपर्क साधला आणि त्यांनी बोलावले. त्यांच्याकडे असलेले आणि मराठवाड्यातील तापमानात सामावून जाईल अशा पद्धतीने स्ट्रॉबेरीचे वाण निवडायला सांगितले. विंटर डाऊन ही 35 डिग्री तापमान सहन करू शकते त्यामुळे या वाणाची निवड केली असल्याचे देखील गणेश बलांडे यांनी म्हटले आहे.

विशेषतः स्ट्रॉबेरीचे उत्पादन घेत असताना त्याची विक्री अजिंठ्याकडे जाणाऱ्या देशी-विदेशी पर्यटकांना फुलंब्री गावातील रस्त्यावर करण्यास सुरुवात केली. तीन महिन्यांच्या कालावधीत 60 हजारांचा खर्च वजा जाता 2 लाख सरासरी निव्वळ नफा मिळाला आहे. सध्या रोज दहा किलो स्ट्रॉबेरी मिळत असून 400 रुपये किलोप्रमाणे दोघांना प्रत्येकी 2 हजार रुपये उत्पन्न मिळत आहे. पुढील चार महिने हे पीक चालणार आहे. तालुक्यात स्ट्रॉबेरीची लागवड नसल्याने ताजी स्ट्रॉबेरी खरेदीसाठी जिल्ह्यातून ग्राहक फोनवर ऑर्डर देत आहेत. स्थानिक पातळीवरच फळ विकलं जात असल्याने त्यांचा वाहतूक खर्च वाचत आगामी काळात 1 एकरवर स्ट्रॉबेरीचे उत्पादन घेण्याचा दोन्ही शेतकऱ्यांचा मानस आहे.

थंड हवामान नसतानाही स्ट्रॉबेरीचे पीक टिकवण्यासाठी बलांडे भावंडांनी विशेष तंत्रज्ञान वापरले. काळ्या मल्चिंगऐवजी सिल्व्हर ब्लॅक मल्चिंग पेपर वापरला. यामुळे सूर्यप्रकाश परावर्तित होऊन उष्णता कमी झाली. रोपांच्या खाली बारीक कुट्टीचा चारा अंथरून मातीला थंडावा दिला. ठिबक सिंचन आणि सेंद्रिय खतांचा वापर करून पाने सुकून काळे पडणे आणि पिवळेपणा येणे असे टाळणे शक्य होणार असल्याचे देखील समाधान बलांडे यांनी म्हटले आहे.