पूरग्रस्त शेतकऱ्यांसाठी राज्य सरकारची मोठी घोषणा! खरडलेल्या जमिनींसाठी मिळणार हे लाभ

पुरामुळे खरडलेल्या, वाहून गेलेल्या किंवा नुकसान झालेल्या शेतजमिनीला पूर्वस्थितीत आणण्यासाठी लागणारी माती, गाळ, मुरूम आणि कंकर मोफत उपलब्ध करून दिले जाणार आहे. यासाठी शेतकऱ्यांना कोणतेही शुल्क, कर किंवा गौण खनिजांवरील रॉयल्टी देण्याची गरज राहणार नाही. महसूल विभागाने याबाबतचे परिपत्रक जाहीर केले असून हा निर्णय तात्काळ लागू करण्याचे आदेशही देण्यात आले आहेत.

पूरामुळे ज्या शेतजमिनींचा पोत बिघडला आहे, भुयारी पाणी वाढल्याने गाळ वाहून गेला आहे किंवा जमिनीचा सुपीक थर नष्ट झाला आहे, अशा जमीनमालकांसाठी हा निर्णय मोठा आधार ठरणार आहे. शेतकऱ्यांना पुन्हा लागवडीयोग्य जमीन तयार करण्यासाठी लागणारी नैसर्गिक माती आणि खनिजे अत्यावश्यक असतात. मात्र या साहित्याची वाहतूक, खरेदी आणि रॉयल्टीचा आर्थिक बोजा शेतकऱ्यांवर मोठा होत होता.

राज्यभरात या निर्णयाची तात्काळ आणि काटेकोर अंमलबजावणी व्हावी यासाठी महसूलमंत्री बावनकुळे यांनी सर्व जिल्हाधिकाऱ्यांना स्पष्ट आदेश दिले आहेत.