दस्त नोंदणीबाबत महसूल विभागाचा मोठा निर्णय! १८६५ पासूनच्या जुन्या दस्तांचे संवर्धन केलं जाणार

नोंदणी आणि मुद्रांक विभागाच्या माहितीनुसार, १८६५ ते २००१ या काळात दस्तांची नोंदणी पारंपरिक पद्धतीने करण्यात येत होती. तर १९२७ ते २००१ या काळात या दस्तांच्या फोटो फिल्म्स तयार करून जतन करण्यात आल्या. सध्या राज्यात ५१७ दुय्यम निबंधक कार्यालयांमध्ये या सर्व जुन्या नोंदी ठेवलेल्या आहेत. कालांतराने अनेक दस्तांवर बुरशी लागल्याने आणि फिल्म खराब झाल्याने त्यांचे संवर्धन आणि पुनर्संचयनाचे मोठे आव्हान उभे राहिले आहे.

नोंदणी व मुद्रांक शुल्क विभागाने अलीकडेच सुरू केलेल्या ‘ई-प्रमाण’ प्रणाली अंतर्गत जुने दस्त आता डिजिटल स्वाक्षरीसह उपलब्ध आहेत. त्यामुळे हे दस्त न्यायालयीन प्रकरणे, सरकारी व्यवहार आणि इतर कायदेशीर बाबींमध्ये अधिकृत पुरावा म्हणून वापरता येतील. यामुळे वर्षानुवर्षे प्रलंबित असलेले अनेक मालमत्ता वाद संपुष्टात येण्यास मदत होईल.

राज्य सरकारचा उद्देश पुढील काही वर्षांत सर्व जुन्या दस्तांना पूर्णतः डिजिटल स्वरूपात आणण्याचा आहे. त्यामुळे हे दस्त केवळ जतनच नव्हे तर भावी पिढ्यांसाठी उपलब्ध वारसा म्हणून टिकून राहतील. डिजिटायझेशनमुळे नोंदी सुरक्षित राहतील, त्यांचा शोध घेणे सोपे होईल आणि इतिहास, कायदा व प्रशासन या सर्व क्षेत्रांना त्याचा फायदा होईल.