सर्जा-राजा सजला अन् गावभर मिरवला! बेंदूर सणाचं महत्व काय? वाचा सविस्तर

बेंदूरच्या दिवशी गाय-बैलांना अंघोळ घालून स्वच्छ करून त्यांची खास सजावट केली जाते. शिंगांना रंगरंगोटी, अंगावर झूल, कड्या, घुंगरू, हार, काजळ, आणि रंगीत कपडे घालून त्यांना आकर्षक रूप दिले जाते. याशिवाय, घरात मातीचे बैल बनवले जातात, आणि त्यांचेही विधिपूर्वक पूजन केले जाते. हरभऱ्याची डाळ आणि गूळ वापरून तयार केलेले कडबोळे मातीच्या बैलांच्या शिंगांवर ठेवून त्यांना पुरणपोळीचा नैवेद्य अर्पण केला जातो.

सणाच्या पार्श्वभूमीवर ग्रामीण भागातील शेतकरी तालुक्याच्या ठिकाणी येऊन बाजारात मोठ्या प्रमाणात खरेदी करतात. यात मातीचे बैल, झूल, सजावटीचे साहित्य, झेंडे, घंटा, मिरवणुकीसाठी ध्वज यांचा समावेश असतो. शहरी भागात देखील मातीच्या बैलांची पूजा केली जाते, त्यामुळे शहरांमध्ये देखील बैलजोड्यांच्या विक्रीसाठी बाजार गजबजलेले दिसले.

यंदा सर्वच पूजन व सजावटीच्या वस्तूंमध्ये किंमतींमध्ये वाढ झाली आहे. मात्र, शेतकरी व नागरिकांचा उत्साह कमी झालेला नाही. पारंपरिक सणाला शोभेसाठी लोकांनी भरभरून खरेदी केली. अनेक ठिकाणी बालगोपाळांनी देखील मातीच्या बैलजोड्या विकत घेऊन त्या सजवण्याचा आनंद लुटला.

बेंदूर आणि पोळा या दोन्ही सणांमध्ये साजरा करण्याची पद्धत साधारण सारखीच असते. काही भागात याला बेंदूर म्हटले जाते, तर काही ठिकाणी पोळा. पण दोन्ही सणांचा केंद्रबिंदू बैल हेच असून त्यांच्या प्रती कृतज्ञता व्यक्त करण्याची भावना समान असते.