TRENDING:
आतापर्यंत महिलांच्या डब्यांमध्येच सीसीटीव्ही कॅमेरे आणि टॉकबॅक प्रणाली प्राधान्याने बसवली जात होती. मात्र आता सामान्य डब्यांमध्येही ही सुविधा उपलब्ध करून देण्याचा निर्णय घेण्यात आला आहे. संबंधित घटना अपवादात्मक असली तरी प्रवाशांच्या सुरक्षेच्या दृष्टीने खबरदारी वाढवणे आवश्यक असल्याचे रेल्वे अधिकाऱ्यांनी स्पष्ट केले आहे.
advertisement
या योजनेअंतर्गत उपनगरीय सेवेत धावणाऱ्या लोकल आणि मेमू ट्रेनमध्ये एकूण 12,006 डोम आणि वेज प्रकारचे कॅमेरे बसवले जाणार आहेत. या कॅमेऱ्यांमध्ये फेस रिकग्निशन प्रणाली आणि प्रगत व्हिडिओ अॅनालिटिक्सची सुविधा असेल. त्यामुळे डब्यातील गर्दी, गोंधळ, संशयास्पद हालचाली किंवा अनुचित प्रकारांवर प्रभावीपणे लक्ष ठेवता येणार आहे. डिसेंबरअखेरीस सीसीटीव्ही कॅमेऱ्यांच्या पुरवठा, बसवणी आणि देखभालीसाठी नव्याने निविदा प्रक्रिया राबवण्यात आली आहे. कंत्राट मंजूर झाल्यानंतर पुढील 10 महिन्यांत सर्व डब्यांमध्ये कॅमेरे बसवण्याचे काम पूर्ण होणार आहे.
चर्चगेट ते डहाणू दरम्यानच्या 123 किलोमीटर लांबीच्या मार्गावर धावणाऱ्या सर्व लोकल डब्यांमध्ये हे सीसीटीव्ही कार्यरत असतील. यामध्ये मोटरमनच्या दोन केबिन्स तसेच ट्रेन मॅनेजरवरही देखरेख ठेवली जाणार आहे. सर्व घडामोडींचे रेकॉर्डिंग किमान 30 दिवसांसाठी जतन केले जाणार असून गरज भासल्यास तपासासाठी ते उपलब्ध असेल.
दरम्यान, सुरक्षाव्यवस्था अधिक मजबूत करण्यासाठी आरपीएफसोबतच आगामी काळात पश्चिम रेल्वेवर सुमारे 4,000 अतिरिक्त जवानांची तैनाती होण्याची शक्यता आहे. मनुष्यबळ वाढवण्याची प्रक्रियाही सध्या सुरू असल्याचे प्रशासनाने सांगितले आहे. या सर्व उपाययोजनांमुळे मुंबईकरांचा लोकल प्रवास अधिक सुरक्षित आणि सुखकर होईल अशी अपेक्षा व्यक्त केली जात आहे.