Aarya Jadhav: रॅप शो ते बिग बॉस; निक्कीला इंगा दाखवणारी आर्या जाधव कोण?

‘बिग बॉस मराठी 5’ घरात काल भाऊच्या धक्क्यावर आर्या जाधवला घराबाहेर काढण्यात आलं. निक्कीवर हात उचलल्यामुळे तिला ही मोठी शिक्षा मिळाली.

टास्कदरम्यान आर्या व निक्कीमध्ये जोरदार खडाजंगी झाली आणि नंतर आर्याने निक्कीच्या कानशिलात लगावली. निक्कीच्या कानशिलात लगावत आर्याने ‘बिग बॉस’च्या नियमांचे उल्लंघन केलं आहे. त्यामुळे बिग बॉसने आर्याला बाहेर काढण्याचा निर्णय सांगितला.

बिग बॉसमध्ये निक्कीला मारुन राडा करणारी आर्या जाधव नेमकी कोण आहे? तिच्याविषयी अधिक माहिती जाणून घेऊया.

आर्या जाधव मुळची अमरावतीची आहे. तिनं रॅप शो 'हसल 2' मध्ये सहभाग घेऊन आपली ओळख बनवली. रॅपमध्ये तिचा मराठी तडका लोकांच्या पसंतीस उतरला आणि ती व्हायरल झाली.

आर्या जाधव ही उद्योजक हेमंत जाधव यांची मुलगी आहे. आर्याचा स्वतःचा बॅंडदेखील आहे. qk नावाचा तिचा स्वतःचा बॅंड आहे. जो युट्यूबवर रॅप, गाणी करुन प्रेक्षकांचं मनोरंजन करतो.

आर्या जाधवला 'रॅपर गर्ल' म्हणूनही ओळखलं जातं. सोशल मीडियावर तिचा चांगलाच दबदबा असतो. त्यामुळे ती नेहमीच चर्चेत असते.

आर्या जाधवला बिग बॉसमध्ये सहभागी होण्याची संधी मिळाली आणि तिनं प्रेक्षकांच्या मनात घर केलं. तिला बिग बॉस घराबाहेर काढताच आता प्रेक्षक तिला सपोर्ट करत आहेत.