Vidarbha Weather Update: विदर्भावर नवं संकट, थंडी ओसरली पण शेतकऱ्यांसाठी महत्त्वाचा अलर्ट

राज्यात डिसेंबरच्या सुरवातीपासूनच गारठा वाढला असून पुणे, नाशिक आणि मराठवाड्यात थंडीचा लाट निर्माण झाली होती. तर विदर्भात देखील थंडीचा जोर कायम होता. आता या हवामानात पुन्हा बदल जाणवत आहेत.

विदर्भातील थंडीचा जोर आता कमी झालेला दिसून येत आहे. 9 ते 10 अंशावरील किमान तापमान आता 14 ते 15 अंशापर्यंत वाढले आहे. आज विदर्भात धुक्यासह ढगाळ हवामानाचे सावट राहणार आहे.

गेल्या 2 दिवसांत विदर्भात निरभ्र आकाश बघायल मिळाले. आता पुन्हा विदर्भात ढगाळ वातावरण राहणार असल्याने शेतकऱ्यांची चिंता वाढणार आहे.  पूर्वीच तुरीवर मर रोगाचा प्रादुर्भाव असून आता ढगाळ हवामानामुळे योग्य ती काळजी घ्यावी लागणार आहे.

आज 21 डिसेंबरला नागपूर, वर्धा, गोंदिया या जिल्ह्यातील किमान तापमान 17 अंश सेल्सिअस इतके असण्याची शक्यता आहे. या तिन्ही जिल्ह्यांतील किमान तापमानात 3 ते 4 अंशांनी वाढ झाली आहे. अमरावती, वाशिम, यवतमाळ या जिल्ह्यातील किमान तापमान 16 अंश, तर अकोला, बुलढाणा जिल्ह्यात 14 अंश राहील.

चंद्रपूरमधील किमान तापमान 15 अंश सेल्सिअस इतके असण्याची शक्यता आहे. तर भंडारा आणि गडचिरोलीत 18-19 अंश सेल्सिअवर पारा असेल. यावरून विदर्भात थंडीचा जोर ओसरला असून पुढील काही दिवस हवामानाची हीच स्थिती राहण्याचा अंदाज आहे.