Vidarbha Weather Update: थंडीची लाट आणि ढगाळ हवामान, विदर्भावर दुहेरी संकट, तुमच्या जिल्ह्यात काय स्थिती?

राज्यात गेले काही दिवस थंडीचा कडाका वाढला असून काही ठिकाणी थंडीची लाट निर्माण झाली आहे. विदर्भातही गेले काही दिवस थंडीचा जोर कायम असल्याचे पाहायला मिळत आहे. काही ठिकाणी किमान तापमान 9 अंशांपर्यंत घसरलं आहे.

विदर्भातील भंडारा जिल्ह्यात सर्वात कमी तापमान नोंदवलं गेलंय. आज भंडाऱ्यातील किमान तापमान 9 अंशावर कायम आहे. तसेच विदर्भातील इतर जिल्ह्यांत देखील किमान तापमानात घट झाल्याने गारवा खूप जास्त जाणवत आहे.

17 डिसेंबरला विदर्भात वातावरण कोरडे राहणार असून कुठलीही पावसाची शक्यता नाही. सर्वच ठिकाणी अंशतः ढगाळ आकाश राहण्याची शक्यता आहे. त्याचबरोबर संपूर्ण विदर्भात थंडीचा जोर कायम असणार आहे.

आज नागपूर, वर्धा या जिल्ह्यातील किमान तापमान 11 अंश तर अमरावती, बुलढाणा, यवतमाळ, वाशिम या सर्व जिल्ह्यातील किमान तापमान 13 अंश सेल्सिअस राहील. या ठिकाणी धुक्यासह ढगाळ आकाश देखील असणार आहे.

अकोला, चंद्रपूरमध्ये 12 तर यवतमाळमध्ये 11 आणि गोंदिया, गडचिरोलीत तापमान 10 अंश सेल्सिअसवर राहील. विदर्भात गेले काही दिवस थंडीचा जोर आणि ढगाळ वातावरण कायम असल्याचे दिसून येत आहे. त्यामुळे शेतकऱ्यांना शेती पिके आणि आरोग्याची काळजी घ्यावी लागणार आहे.