Vidarbha Weather Update: डिसेंबरअखेर अवकाळी संकट, विदर्भात पुन्हा यलो अलर्ट, तुमच्या जिल्ह्यात काय स्थिती?

गेल्या 3 दिवसांपासून राज्यावर अवकाळी संकट घोंघावत आहे. 27 डिसेंबरला राज्यातील विविध भागांत पाऊस झाला. विदर्भातील हवामानात देखील बदल जाणवत असून काही ठिकाणी विजांच्या कडकडाटासह हलका ते मध्यम स्वरुपाचा पाऊस झाला.

विदर्भात आज देखील पावसाचा इशारा देण्यात आला आहे. विदर्भातील नागपूर, भंडारा, गोंदिया, चंद्रपूर, अमरावती या जिल्ह्यांत विजांच्या कडकडाटासह आणि मेघगर्जनेसह हलक्या ते मध्यम पावसाची शक्यता आहे. या सर्व जिल्ह्यांना 28 डिसेंबरसाठी यलो अलर्ट जारी करण्यात आलाय.

विदर्भातील प्रमुख शहर असलेल्या नागपूरमध्ये 28 डिसेंबर रोजी विजांच्या कडकडाटासह आणि मेघगर्जनेसह हलक्या ते मध्यम पावसाची शक्यता आहे. नागपूर मधील किमान तापमान 19 अंश सेल्सिअस इतके राहील. पुढील काही दिवसांत किमान तापमानात घट होऊन थंडीचा जोर वाढण्याची शक्यता आहे.

अमरावती, वर्धा, बुलढाणा, यवतमाळ, भंडारा या सर्व जिल्ह्यांतील किमान तापमान 19 अंश राहील. त्याचबरोबर विजांच्या कडकडाटासह आणि मेघगर्जनेसह हलक्या ते मध्यम पावसाची शक्यता देखील हवामान विभागानं वर्तवली आहे.

वाशिममध्ये पावसाची कोणतीही शक्यता नसून आकाश ढगाळ राहील. तर अकोला, गडचिरोली जिल्ह्यात देखील ढगाळ हवामान राहून हलक्या पावसाची शक्यता आहे. बदलत्या हवामानामुळे शेती पिकांना धोका निर्माण झाला असून शेतकऱ्यांना योग्य ती काळजी घ्यावी लागणार आहे.