Mumbai Rain: मुंबई ते सिंधुदुर्ग धो धो पाऊस अन् 24 तासांत हवापालट, हवामान विभागाचा आज कोणता अलर्ट?

कोकण किनारपट्टीवर हवामान विभागाने मंगळवारी ऑरेंज अलर्ट दिला होता. मुंबई, ठाणे, नवी मुंबई, पालघर आणि कोकणातील काही भागांत 15 जुलै रोजी दिवसभर मुसळधार पावसाचा जोर पाहायला मिळाला. अनेक सखल भागांत पाणी साचले होते आणि वाहतुकीवरही त्याचा परिणाम जाणवला. मात्र, आज 16 जुलै रोजी या भागांमध्ये पावसाने थोडी विश्रांती घेतली असून हवामान ढगाळ आणि दमट राहणार आहे. हवामान खात्याच्या अंदाजानुसार, काही भागांत हलक्या ते मध्यम स्वरूपाच्या सरी पडण्याची शक्यता आहे.

मुंबईत 15 जुलै रोजी दिवसभर जोरदार पावसामुळे वाहतूक सेवा विस्कळीत झाली. आज सकाळपासून वातावरणात बदल जाणवत असून, आकाश पूर्णतः ढगांनी व्यापले आहे. काही भागांत सकाळी रिमझिम सरी पडल्या, मात्र दुपारी पावसाचा जोर तुलनेने कमी राहण्याची शक्यता आहे. तापमान 30 अंश सेल्सियसच्या आसपास, तर आर्द्रता 85 टक्के पेक्षा जास्त असल्यामुळे दमटपणा जाणवतो आहे.

ठाणे व नवी मुंबई परिसरात मंगळवारी संध्याकाळी मुसळधार पाऊस झाला. त्यामुळे काही भागांत पाणी तुंबल्याने रहदारीवर परिणाम झाला. आज वातावरणात दिलासा मिळाला असून, ढगाळ हवामान आणि थोडक्याच सरी पडत आहेत. हवामान खात्यानुसार, दुपारनंतर काही भागांत मध्यम स्वरूपाच्या सरी येऊ शकतात. तापमान 29-30 अंश सेल्सियसदरम्यान राहील.

पालघर जिल्ह्यात आज, 16 जुलै रोजीचे हवामान ढगाळ राहण्याचा अंदाज हवामान विभागाने वर्तवला आहे. सकाळपासून वातावरण ढगाळ असून, काही भागांत हलक्याशा सरी पडण्याची शक्यता आहे. दुपारी आणि संध्याकाळी पावसाचा जोर वाढण्याची शक्यता कमी असली, तरी आकाशात ढग दाटून राहतील. कमाल तापमान अंदाजे 33 अंश सेल्सियस, तर किमान तापमान 25 अंश सेल्सियस राहण्याची शक्यता आहे.

कोकणातील रत्नागिरी, रायगड व सिंधुदुर्ग या जिल्ह्यांमध्ये 15 जुलै रोजी काही ठिकाणी अतिवृष्टी झाली होती. महाड, दापोली, देवगड, वेंगुर्ला या भागांत पावसाने मुसळधार हजेरी लावली होती. मात्र आज वातावरण काहीसं शांत असून, ढगाळ हवामान आहे. सकाळपासून रिमझिम सरी सुरू आहेत. दुपारी व संध्याकाळच्या सुमारास हलक्या ते मध्यम पावसाचा अंदाज आहे. तापमान 28-29 अंशांच्या आसपास असून, आर्द्रता खूप जास्त आहे.