नाव देशभरात गाजलं, मतं मिळाली नाहीत; भाजपाच्या सोनिया गांधींचा मुन्नारमध्ये पराभव, नावाचं राजकारण फसलं

केरळमध्ये सुरू असलेल्या स्थानिक स्वराज्य संस्थांच्या निवडणुकांचे निकाल हळूहळू समोर येत आहेत. आतापर्यंतच जाहीर झालेल्या निकालानुसार काँग्रेसच्या नेतृत्वाखालील यूडीएफची आघाडी दिसून येत आहे. मात्र या निवडणुकीत एक नाव संपूर्ण देशात चर्चेचा विषय ठरले होते, ते म्हणजे भाजपाच्या उमेदवार सोनिया गांधी.

मुन्नारमधून निवडणूक लढवणाऱ्या भाजपाच्या उमेदवाराचे नाव सोनिया गांधी असल्याचे समोर आल्यानंतर अनेकांना धक्का बसला होता. मात्र निकालानंतर या सोनिया गांधींनाच मोठा धक्का बसला असून त्या निवडणुकीत पराभूत झाल्या आहेत.

हा पराभव केवळ एका वॉर्डापुरता मर्यादित नाही, तर नाव, राजकीय वारसा आणि विचारधारा यांचा अनोखा संघर्ष दाखवणारी राजकीय कथा ठरली आहे. मुन्नारमधील नल्लाथन्नी वॉर्ड (वॉर्ड क्रमांक 16) मधून भाजपाच्या सोनिया गांधी यांनी निवडणूक लढवली होती. त्यांच्यासमोर डाव्या आघाडीच्या (एलडीएफ) उमेदवार वलारमती होत्या. मतमोजणीत वलारमती यांनी आघाडी घेत सोनिया गांधींचा पराभव केला.

34 वर्षीय सोनिया गांधी यांचे नाव माजी काँग्रेस अध्यक्ष सोनिया गांधी यांच्यासारखेच असल्याने ही बाब राष्ट्रीय पातळीवर चर्चेत आली होती. सोशल मीडियावर अनेकांनी, खरंच सोनिया गांधी केरळमध्ये निवडणूक लढवत आहेत का? असे प्रश्न विचारले होते. मात्र प्रत्यक्षात ही वेगळीच व्यक्ती असल्याचे स्पष्ट झाले होते.

सोनिया गांधी यांचा जन्म काँग्रेसशी जुना संबंध असलेल्या कुटुंबात झाला. त्यांचे वडील दिवंगत दुरैराज हे काँग्रेसचे स्थानिक स्तरावरील ज्येष्ठ नेते होते आणि नल्लाथन्नी–कल्लार परिसरात त्यांची ओळख होती. काँग्रेस नेत्या सोनिया गांधी यांच्याविषयी आदर असल्यानेच त्यांनी आपल्या मुलीचे नाव सोनिया गांधी ठेवले होते.

मात्र लग्नानंतर त्यांच्या राजकीय वाटचालीत बदल झाला. त्यांचे पती सुभाष हे भाजपाचे सक्रिय कार्यकर्ते असून सध्या पंचायतचे जनरल सेक्रेटरी आहेत. पतीच्या राजकीय भूमिकेमुळे सोनिया गांधी यांनी भाजपात प्रवेश केला आणि भाजपाच्या तिकिटावर निवडणूक लढवली.

दरम्यान केरळमध्ये 1,199 स्थानिक स्वराज्य संस्थांच्या निवडणुकांसाठी मतमोजणी सकाळी आठ वाजल्यापासून सुरू आहे. सुरुवातीच्या कलानुसार ग्रामीण भागात एलडीएफ, तर शहरी भागात यूडीएफची आघाडी दिसत आहे. हे निकाल 2026 च्या विधानसभा निवडणुकांपूर्वी सेमीफायनल मानले जात आहेत. या पार्श्वभूमीवर सोनिया गांधी यांचा पराभव एका छोट्या वॉर्डपुरता असला तरी त्याची चर्चा मात्र राज्याबाहेरही होत आहे.