Weather Alert: सोलापूरचा पारा चढला, पुणे ते कोल्हापूर धो धो कोसळणार, आजचा हवामान अंदाज

कोकण, घाटमाथ्यासह पश्चिम महाराष्ट्रात पावसाच्या हलक्या ते मध्यम सरी कोसळत आहेत. तर कोल्हापूरसह काही भागात मंगळवारी पावसाचा जोर राहिला. आज 16 जुलै रोजीचा पश्चिम महाराष्ट्रातील जिल्हानिहाय हवामान अंदाज जाणून घेऊ.

सातारा जिल्ह्यात मागील 24 तासात मध्यम पाऊस झाला. सातारा परिसरामध्ये 15 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 29 अंश सेल्सिअस राहील. सातारा जिल्ह्यामध्ये ढगाळ आकाशासह गडगडाटी पावसाची शक्यता हवामान विभागाने वर्तवली आहे.

मागील 24 तासात पुण्याच्या शिवाजीनगर परिसरात 6.9 मिलिमीटर पावसाची नोंद झाली. यावेळी कमाल तापमान 26.6 अंश सेल्सिअस राहिले. पुढील 24 तासात पुणे घाटमाथ्यावर हलका पाऊस राहील. उर्वरित जिल्ह्यात ढगाळ आकाशासह हलक्या पावसाची शक्यता हवामान विभागाने वर्तवली आहे.

कोल्हापूर परिसरात 40 मिलीमीटर पाऊस नोंदविण्यात आला. यावेळी कमाल तापमानात वाढ नोंदविण्यात आली. कमाल तापमान 27.4 अंश सेल्सिअस राहिले. पुढील 24 तासात कमाल तापमान 28 अंशावर स्थिर राहील.

सोलापूर जिल्हात पावसाची उघडीप कायम असून जिल्ह्यातील कमाल तापमानात वाढ होत आहे. मागील 24 तासात 34.4 अंश तापमानाची नोंद झाली. तर पुढील 24 तासात कमाल तापमानाचा पारा 35 अंशावर राहणार असून ढगाळ आकाशासह एक दोन वेळा गडगडाटी पावसाची शक्यता आहे.

सांगली जिल्ह्यात मंगळवारी 15 मिलिमीटर पावसाची नोंद झाली. पुढील 24 तासात सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 30 तर किमान तापमान 22 अंश सेल्सिअस इतके राहील.

पश्चिम महाराष्ट्रातील सर्वच जिल्ह्यांत आकाश साधारणपणे ढगाळ राहील. सातारा, सांगली आणि कोल्हापूर परिसरात गडगडाटी पावसाचा अंदाज आहे. तसेच जिल्हाअंतर्गत परिसरात हलक्या पावसाची शक्यता हवामान विभागाकडून वर्तवण्यात आली आहे.