Weather Alert: 24 तासांत हवा बदलणार, धो धो कोसळणार, पुणे ते कोल्हापूर आजचा हवामान अंदाज

गेल्या काही काळात कोकण, घाटमाथ्यासह विदर्भात जोरदार पाऊस सुरू आहे. आता कोकण आणि घाटमाथ्यावर काही प्रमाणात मान्सूचा जोर ओसरला आहे. पश्चिम महाराष्ट्रात देखील काही ठिकामी हलका ते मध्यम स्वरुपाचा पाऊस सुरू आहे. पुढील 24 तासांतील जिल्हानिहाय हवामान अंदाज जाणून घेऊ.

सातारा जिल्ह्यात मागील 24 तासात हलका पाऊस झाला. सातारा परिसरामध्ये 2 मिलिमीटर पावसाची नोंद झाली. पुढील 24 तासात कमाल तापमान 28 अंश सेल्सिअस राहील. सातारा जिल्ह्यामध्ये ढगाळ आकाशासह गडगडाटी पावसाची शक्यता हवामान विभागाने वर्तवली आहे.

पुण्याच्या शिवाजीनगर परिसरात बुधवारी 8.3 मिलिमीटर पावसाची नोंद झाली. यावेळी कमाल तापमान 30.2 अंश सेल्सिअस राहिले. पुढील 24 तासात पुणे घाटमाथ्यावर हलका पाऊस राहील. उर्वरित जिल्ह्यात ढगाळ आकाशासह हलक्या पावसाची शक्यता हवामान विभागाने वर्तवली आहे.

कोल्हापूर परिसरात 9 मिलीमीटर पाऊस नोंदविण्यात आला. यावेळी कमाल तापमानात वाढ नोंदविण्यात आली. कमाल तापमान 29.2 अंश सेल्सिअस राहिले. पुढील 24 तासात कमाल तापमान 28 अंशावर स्थिर राहील. तर 18 जुलै रोजी जिल्ह्यात मुसळधार पावसाची शक्यता असून यलो अलर्ट जारी करण्यात आला आहे.

सोलापूर जिल्हात पावसाची उघडीप कायम असून जिल्ह्यातील कमाल तापमानात वाढ होत आहे. मागील 24 तासात 34.1 अंश तापमानाची तर 0.5 पावसाची नोंद सोलापुरात झाली. पुढील 24 तासात कमाल तापमानाचा पारा 35 अंशावर राहणार असून ढगाळ आकाशासह एक दोन वेळा गडगडाटी पावसाची शक्यता आहे.

मागील 24 तासात सांगली जिल्ह्यात 4 मिलिमीटर पावसाची नोंद झाली. आज जिल्ह्यात ढगाळ आकाशासह हलक्या पावसाचा अंदाज आहे. यावेळी कमाल तापमान 32 तर किमान तापमान 23 अंश सेल्सिअस इतके राहील. तर 24 तासानंतर सांगलीत पावासाचा जोर वाढणार असून हवामान विभागाने यलो अलर्ट जारी केला आहे.

पश्चिम महाराष्ट्रातील सर्वच जिल्ह्यांत आकाश साधारणपणे ढगाळ राहील. सातारा, सांगली आणि कोल्हापूर परिसरात गडगडाटी पाऊस राहील. तसेच जिल्हाअंतर्गत परिसरात हलका पावसाची शक्यता हवामान विभागाकडून वर्तवण्यात आली आहे. त्यामुळे शेतकरी आणि नागरिकांनी योग्य ती काळजी घ्यावी.