Weather Alert: पावसाची उघडीप, पण IMD चा धोक्याचा इशारा, पुणे ते कोल्हापूर कसं असेल हवामान?

राज्यात मान्सून सक्रिय झाला असून कोकण ते विदर्भ सर्व भागात जोरदार पाऊस सुरू आहे. आज 17 जून रोजी कोकण घाटमाथ्यावर पावसाचा जोर कायम राहण्याची शक्यता आहे. पुढील 24 तासात पश्चिम महाराष्ट्रात पावसाचा जोर अंशतः कमी राहण्याची शक्यता हवामान विभागाने वर्तविली आहे.

पुणे जिल्ह्यात मागील 24 तासात 29.4 अंश सेल्सिअस कमाल तापमानाची नोंद झाली. तसेच पुणे परिसरात 43 मिलीमीटर तसेच शिवाजीनगर परिसरात 30.6 मिलीमीटर पाऊस नोंदविण्यात आला. आज कमाल तापमान 30 अंशावर राहिल. पुण्यामध्ये पाऊस काहीशी उघडीप घेण्याची शक्यता असली तरीही पुणे घाटमाथ्यावर मात्र पावसाची शक्यता आहे.

गेल्या 24 तासात कोल्हापूर परिसरात 43 मिलीमीटर पावसाची नोंद झाली. आज कोल्हापूरच्या घाटमाथ्यावर जोरदार पावसाची शक्यता आहे. यावेळी कमाल तापमान 30 अंश सेल्सिअस तर किमान तापमान 22 अंश सेल्सिअस वर असेल. जोरदार पावसाची शक्यता असल्याने भारतीय हवामान विभागाने कोल्हापूरच्या घाटमाथ्यास सावधानतेचा ऑरेंज अलर्ट दिला आहे.

साताऱ्यातील पारा सोमवारी 26.6 अंश सेल्सिअसवर राहिला. तसेच मागील 24 तासात 15 मिलीमीटर पावसाची नोंद झाली. आज जिल्ह्यातील कमाल तापमान 30 अंशावर राहील. घाटमाथ्यावर पावसाची शक्यता असल्याने हवामान विभागाकडून दक्षतेचा इशारा देण्यात आला आहे.

गेल्या 24 तासात सोलापूर परिसरात 0.3 मिलीमीटर पाऊस नोंदविण्यात आला. तसेच कमाल तापमान 30.9 अंशावर राहिले. आज सोलापूर जिल्ह्यातील कमाल तापमान 34 अंशावर राहील. ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे.

गेल्या 24 तासात सांगली जिल्ह्यात 19 मिलिमीटर पावसाची नोंद झाली. पुढील 24 तासात सांगली जिल्ह्यात हलक्या पावसाचा अंदाज आहे. यावेळी जिल्ह्यातील कमाल तापमान 31 तर किमान तापमान 22 अंश सेल्सिअस इतके राहील.

दरम्यान, पुढील 24 तासात संपूर्ण पश्चिम महाराष्ट्रात हलक्या पावसाची तसेच कोल्हापूर, सातारा आणि पुणे घाटमाथ्यास जोरदार पावसाची शक्यता हवामान विभागाकडून वर्तवण्यात आली आहे. त्यामुळे नागरिकांना योग्य ती काळजी घ्यावी लागेल.