TRENDING:
पुणे जिल्ह्यातील लोणावळा नगरपरिषदेसाठी एक महत्त्वाचा निर्णय घेण्यात आला आहे. मतदान प्रक्रियेसाठी नियुक्त पथके 1 डिसेंबर रोजी दुपारपर्यंत सर्व मतदान केंद्रांवर पोहोचणार आहेत. त्या आधी शाळांमध्ये तयार करण्यात आलेली मतदान केंद्रे रिकामी असणे आवश्यक आहे. त्यामुळे सहाय्यक निवडणूक निर्णय अधिकारी अशोक साबळे यांनी 1 डिसेंबर रोजी शाळांना सकाळी 11 नंतर सुटी देण्याचे आदेश सर्व संबंधित शाळांच्या मुख्याध्यापक व प्राचार्यांना पाठवले आहेत.
advertisement
पुण्यात पोलिसांनी रिक्षा अडवली; आत सापडलं असं काही की सगळेच थक्क, चालकाला अटक
दरम्यान, सकाळी नियमित वर्ग होणार असले तरी 11 नंतर विद्यार्थ्यांना सुटी देऊन मतदान केंद्रे प्रशासनाकडे देण्याची जबाबदारी शाळांना देण्यात आली आहे. मतदान प्रक्रियेची अचूक आणि शांततेत अंमलबजावणी करण्यासाठी शाळांनी या निर्देशांचे काटेकोर पालन करणे बंधनकारक असल्याचेही परिपत्रकात नमूद करण्यात आले आहे.
पुण्यातील या नगरपरिषदांसाठी मतदान
पुणे जिल्ह्यातील आळंदी, बारामती, चाकण, दौंड, इंदापूर, जेजुरी, जुन्नर, सासवड, तळेगाव-दाभाडे, वडगाव यांसह लोणावळा नगरपरिषदाही या निवडणुकांमध्ये सहभागी आहे. मात्र लोणावळा नगरपरिषदेतील प्रभाग क्रमांक 10-अ आणि 5-ब हे पुढील तारखेला ढकलण्यात आले आहेत. तसेच तळेगाव दाभाडे नगरपरिषदेतील प्रभाग 2-अ, 7-अ, 7-ब, 8-अ, 8-ब आणि 10-ब हेही पुढे ढकलले गेले आहेत. या दोन्ही नगरपरिषदांसाठी मतदान 20 डिसेंबर रोजी घेण्यात येणार असून मतमोजणी 21 डिसेंबरला होणार आहे. तरीही ज्या नगरपरिषद आणि नगरपंचायत क्षेत्रात निवडणूक होत आहे, तेथील मतदान केंद्र असणाऱ्या शाळा बंद राहणार आहेत.
राज्यातील या जिल्ह्यांत निवडणुका
आगामी निवडणुकांमध्ये कोणत्या नगरपरिषदांमध्ये आणि नगरपंचायतींमध्ये मतदान होणार आहे, याबाबत जिल्हावार यादी जाहीर करण्यात आली आहे. रत्नागिरी, सिंधुदुर्ग, नाशिक, जळगाव, कोल्हापूर, पुणे, सातारा, सांगली, सोलापूर, बीड, नांदेड, नागपूर, अमरावती, चंद्रपूर तसेच गडचिरोली या जिल्ह्यांतील शेकडो नगरपरिषदा आणि नगरपंचायतींमध्ये मतदार आपल्या स्थानिक स्वराज्य प्रतिनिधींची निवड करणार आहेत.
राज्यातील स्थानिक स्वराज्य संस्थांच्या या मोठ्या निवडणूक प्रक्रियेकडे सर्वांचे लक्ष लागले असून मतदानासाठी नागरिकांना पुढे येण्याचे आवाहनही प्रशासनाकडून करण्यात येत आहे.