Pune News: प्रियकरानं प्रेयसीला संपवलं, मग टोकाचं पाऊल उचललं, पुणे हादरलं

पुणे : पुण्यातील संगमवाडी परिसरात मोठी खळबळ उडाली आहे. पुन्हा एकदा प्रेमसंबंधातील वादातून दुहेरी मृत्यूची धक्कादायक घटना समोर आली आहे. संगमवाडी परिसरात एका तरुणाने आपल्या मैत्रिणीची हत्या केली असून, त्यानंतर पिंपरी परिसरात जाऊन स्वतःलाही जीवन संपवले.दिव्या नीगोते (मृत तरुणी) आणि गणेश काळे (आत्महत्या केलेला तरुण) अशी मृत व्यक्तींची नावे आहेत.

पोलिसांनी दिलेल्या माहितीनुसार, दिव्या आणि गणेश हे दोघेही पुण्यातील ससून रुग्णालयात नोकरीला होते. कामाच्या ठिकाणी झालेल्या ओळखीचं पुढे प्रेमसंबंधात रूपांतर झाले. मात्र, काही दिवसांपासून या दोघांमध्ये वाद वाढले होते. या वादामुळे तणावग्रस्त झालेल्या गणेशने टोकाचे पाऊल उचलल्याची प्राथमिक माहिती पोलिसांनी दिली आहे.

शुक्रवारी सकाळी संगमवाडी परिसरात तरुणीचा मृतदेह आढळून आला. स्थानिकांनी याची माहिती पोलिसांना दिल्यानंतर तपास सुरु झाला. घटनास्थळी मिळालेल्या पुराव्यानुसार दिव्याची हत्या करून गणेश पळून गेल्याचा संशय व्यक्त करण्यात येत होता. त्याचवेळी, पिंपरी परिसरात गणेश काळे याचा मृतदेह सापडला. त्याने आत्महत्या केल्याचे प्राथमिक तपासात स्पष्ट झाले आहे.

दिव्या मूळची पुण्यातील असून गणेश हा बीड जिल्ह्यातील रहिवासी आहे. दोघेही ससून रुग्णालयात कामाला होते. काही दिवसांपूर्वी झालेल्या वादामुळे दोघांमध्ये दुरावा निर्माण झाला होता. या तणावातूनच गणेशने आधी दिव्याची हत्या केली आणि नंतर स्वतःचेही जीवन संपवले असण्याची शक्यता तपासात पुढे येत आहे.

घटनेची माहिती मिळताच पोलिसांनी दोन्ही ठिकाणी पंचनामा करून मृतदेह शवविच्छेदनासाठी ससून रुग्णालयात पाठवले आहेत. या प्रकरणाचा पुढील तपास सुरू असून, वादाचे नेमके कारण काय होते याचा शोध घेतला जात आहे. शहरात घडलेल्या या दुर्दैवी प्रकारामुळे हळहळ व्यक्त होत आहे