महायुतीतले झारीतील शुक्राचार्य कोण ? शिवसेनेच्या वरिष्ठांनी विचार करावा, रविंद्र चव्हाणांनी पुन्हा डिवचलं

ठाणे आणि कल्याण डोंबिवलीतील पक्षप्रवेशावरून राज्याचे उपमुख्यमंत्री एकनाथ शिंदे आणि भाजप प्रदेशाध्यक्ष रविंद्र चव्हाण यांच्यात गेल्या काही महिन्यांपासून संघर्ष सुरू आहे. त्यांच्यातील संघर्षामुळे महायुतीत देखील तणाव आहे. याच पार्श्वभूमीवर न्यूज १८ लोकमतने रविंद्र चव्हाण यांच्याशी विशेष संवाद साधला. यावेळी महायुतीतील झारीचे शुक्राचार्य कोण आहेत याचा सेनेच्या नेतृत्वाने शोध घ्यावा, असे विचार करायला लावणारे वक्तव्य केले.

भाजपात जर एकदा ठरलं तर नंतर कोणी विचारत नाही कुठे ठरलं, काय ठरलं? काही लोकांनी इतक्याही हलक्या कानाचे राहू नये, असे रविंद्र चव्हाण म्हणाले. त्यांचा रोख एकनाथ शिंदे यांच्याकडे होता. तसेच सरकारमध्ये एक नंबरच सर्वश्रेष्ठ असतो. नंबर दोन वगैरे काही नसते, असे म्हणत त्यांनी एकनाथ शिंदे यांना डिवचले होते. यावर विचारल्यानंतर रविंद्र चव्हाण म्हणाले, नंबर दोनच्या संदर्भाने मी जे काही म्हटले होते ते आर आर पाटील यांच्या भाषणाचा संदर्भ देऊन म्हटले होते. माझे भाषण शंभूराज देसाई यांनी तपासून पाहावे.

मी सार्वजनिक बांधकाम मंत्री असताना कराड पट्ट्यात खूप विकासकामे केली. तो विकास पाहून तिथे शत-प्रतिशत भाजपा सुरू झाली आहे. तिथले लोक भाजपमध्ये येऊ लागली आहेत, असे रविंद्र चव्हाण यांनी स्पष्ट केले.

भारतीय जनता पक्ष वाढत चाललाय. लोक पक्षात येतायेत. आगामी काळातही भारतीय जनता पक्षात प्रवेश सुरूच राहतील. मुंबई महापालिकेत महापौर कोणाचा असेल हा विषय वेगळा आहे, असे चव्हाण म्हणाले.