Shravan 2025: श्रावणात महामृत्युंजय मंत्राचा जप कधी, केव्हा, कसा करायचा? आश्चर्यकारक परिणाम पाहाल

महामृत्युंजय मंत्राचा जप करण्यासाठी श्रावण महिना सर्वात उत्तम मानला जातो. श्रावण महिन्यात येणाऱ्या प्रत्येक सोमवारी या मंत्राचा जप करणे विशेष फलदायी असते. पहाटे ४:०० ते ५:३० या ब्रह्म मुहूर्तावर जप केल्यास त्याचे सर्वाधिक फायदे मिळतात. तसं करणं शक्य नसल्यास सकाळी लवकर स्नान झाल्यावर जप करावा. रात्री झोपताना भीती वाटत असल्यास किंवा रात्रीच्या वेळी कोणत्याही संकटातून मुक्ती मिळवण्यासाठी जप केला जातो.

महामृत्युंजय मंत्राचा जप पूर्ण शुद्धता आणि नियमानुसार करणे आवश्यक आहे, तरच त्याचे पूर्ण फळ मिळते. जप करताना जमिनीवर थेट बसू नये. कुश किंवा लोकरीचे आसन वापरावे. मंत्र जपासाठी पूर्व किंवा उत्तर दिशेकडे तोंड करून बसावे. जप करण्यासाठी रुद्राक्षाची माळ वापरावी. माळ 'गौमुखी' (माळ ठेवण्यासाठीची पिशवी) मध्ये ठेवणे अधिक शुभ मानले जाते. मंत्राचा उच्चार स्पष्ट आणि योग्य असावा. तो मोठ्याने न म्हणता, मंद आवाजात आणि शांत मनाने म्हणावा. मंत्राचा उच्चार स्पष्ट येत नसेल, तर तो आधी चांगल्या प्रकारे शिकून घ्या. जप करण्यासाठी जागा निश्चित करावी. जप करताना एका ठिकाणीच बसून जप पूर्ण करावा. हा मंत्र किमान १०८ वेळा जपला जातो. दररोजच्या जपामध्ये मंत्राची संख्या कमी न करता ती वाढवण्याचा प्रयत्न करावा. जप करताना तुमचे मन एकाग्र असावे. मन इकडे तिकडे भटकू देऊ नये आणि पूर्ण लक्ष मंत्राच्या उच्चारणावर ठेवावे. जप करताना समोर शिवलिंग, भगवान शंकराची मूर्ती किंवा फोटो ठेवणे अत्यंत शुभ मानले जाते. शक्य असल्यास, जप करताना शिवलिंगावर दूध किंवा पाणी अर्पण करत राहावे.