Beed Crime: बीडमध्ये कायद्याचा खेळखंडोबा! अपहरण करून झाडाला बांधलं, बेदम मारहाणीत तरुणाने जीव गमावला

सुरेश जाधव, प्रतिनिधी, बीड: बीड जिल्ह्यातील कायदा आणि सुव्यवस्था अस्तित्वात आहे की नाही, असा प्रश्न मागील काही घटनांवरून उपस्थित होत आहे. बीडमध्ये अपहरण करुन मारहाणीचे व्हिडीओ व्हायरल होत असताना आणखी एका धक्कादायक घटना समोर आली आहे. केज तालुक्यातील भाटूंबा या गावात अमानुष घटनेने खळबळ उडाली आहे. अनैतिक संबंधाच्या संशयातून अण्णा उर्फ ज्ञानेश्वर धपाटे या तरुणाचे अपहरण करून त्याला झाडाला बांधून निर्घृण मारहाण करण्यात आली. या गंभीर मारहाणीमुळे जखमी झालेल्या धपाटे याला तात्काळ अंबाजोगाई येथील स्वामी रामानंद तीर्थ शासकीय रुग्णालयात दाखल करण्यात आले होते. मात्र, उपचारादरम्यान त्याचा मृत्यू झाला.