ना मातीची गरज, ना प्रकाशाची... बंद AC खोलीत पिकवला जातो 'हा' गांजा; 1kg ची किंमत ऐकून व्हाल चकित!

'हायड्रोपोनिक' गांजा म्हणजे मातीचा वापर न करता, बंद आणि वातानुकूलित खोलीत उगवलेला गांजा. 'कोकोपिट' (नारळाच्या शेंड्याचा चुरा) किंवा पाण्यात पोषक द्रव्ये मिसळून याची लागवड केली जाते. यामुळे कमी वेळेत अधिक उत्पादन मिळते आणि हा गांजा सामान्य गांजापेक्षा अधिक प्रभावी असतो. त्याची नशा तीव्र असल्याने त्याला जास्त मागणी असते. मुंबईत जप्त झालेल्या एका किलो हायड्रोपोनिक गांजाची किंमत एक कोटी रुपये होती.

या गांजाची तस्करी प्रामुख्याने इंडोनेशिया, मलेशिया, ऑस्ट्रेलिया, अमेरिका आणि थायलंड यांसारख्या देशांतून होते. दोन महिन्यांपूर्वी मुंबई पोलिसांनी दोन इंडोनेशियन नागरिकांना अटक करून त्यांच्याकडून 21 कोटी रुपयांचा गांजा जप्त केला होता. महाराष्ट्रातील एक तरुण ऑस्ट्रेलियातून भारतात गांजा पाठवत असताना त्यालाही अटक करण्यात आली आहे.

अमली पदार्थ कायद्यानुसार, कमी प्रमाणात अमली पदार्थ सापडल्यास 1 वर्षाची कैद आणि 10 हजार रुपये दंड असतो. मोठ्या प्रमाणात आढळल्यास 10 वर्षांची शिक्षा आणि विक्रीच्या उद्देशाने बाळगल्यास 10 ते 20 वर्षांचा कारावास आणि 1 ते 2 लाख रुपये दंडाची तरतूद आहे.