शुभांगी शिंदे हुंडाबळी प्रकरण, पैशांसाठी लाज विकली, विवाहितेला छळ छळ छळलं, बीडमधील भाजपचा नेता फरार

गुरुवारी बीड जिल्ह्यातील अंबाजोगाई तालुक्यातील गित्ता गावात शुभांगी शिंदे नावाच्या २५ वर्षीय विवाहितेनं मृत्यूला कवटाळलं. सासरी पैशांसाठी होणाऱ्या छळाला कंटाळून तिने राहत्या घरात गळफास घेऊन आत्महत्या केली. या प्रकरणी पती संतोष शिंदे, विलास शिंदे, सुमन शिंदे, सीमा शिंदे आणि भाजपचा धारूर तालुकाध्यक्ष संदीप काचगुंडे यांच्याविरोधात गुन्हा दाखल केला आहे. पोलिसांनी चार आरोपींना बेड्या ठोकल्या आहेत. मात्र भाजपचा नेता काचगुंडे मात्र फरार आहे. पोलीस त्याचा शोध घेत आहेत.

मिळालेल्या माहितीनुसार, २०२२ मध्ये शुभांगी शिंदेचा विवाह गित्ता येथील संतोष शिंदे यांच्याशी झाला होता. त्यांना दीड वर्षांचा मुलगा आहे. संतोष शिंदे यांचं अंबाजोगाई आणि धारुर येथे ऑप्टीकलची दोन दुकानं आहेत. अशात त्यांना तिसरं दुकान सुरू करायचं होतं. तिसरे दुकान टाकण्यासाठी माहेरहून पैसे आण, म्हणत आरोपींनी सासरी शुभांगीचा छळ केल्याचा आरोप आहे.

सासरी मुलीचा छळ होत असल्याने माहेरच्या मंडळींनी काही दिवसांपूर्वी आरोपींना १ लाख रुपये दिले होते. मात्र काही दिवसांनी पुन्हा पैशांची मागणी होऊ लागली. त्यानंतर ऑगस्ट २०२४ मध्ये ४ लाख रुपये दिले होते. मात्र काही दिवस झाल्यानंतर पुन्हा पैशांची मागणी होऊ लागली. एवढंच नाही तर ६ महिन्यांपूर्वी आरोपींनी विवाहितेला माहेरी मोहखेड (ता. धारूर) येथे आणून सोडले होते. ४ लाख दिले तरच नांदवू अशी धमकी दिली होती. गुरुवारी शुभांगीनं राहत्या घरी गळफास घेऊन आत्महत्या केली. शुभांगीच्या मृत्यूने दीड वर्षांचा चिमुकला पोरका झाला आहे.