अनुषा दांडेकरने करण कुंद्राचा वापर केला? म्हणाली,'यूज करो जब तक...'; 9 दिवसांपूर्वीच अभिनेत्याला म्हणालेली 'धोकेबाज'

अनुषा दांडेकरचा एक व्हिडीओ सध्या सोशल मीडियावर जोरदार व्हायरल होत आहे. या व्हिडीओमध्ये अनुषा आपल्या ‘सिचुएशनशिप’वर बोलत आहे. व्हिडीओमध्ये अनुषा थेट कबूल करते की, तिला कधीच खरं प्रेम झालंच नाही. सिचुएशनशिपबद्दल बोलताना ती म्हणते,"याचा अर्थ असतो समोरील व्यक्तीच्या आयुष्यात आपली जागा बूक करुन ठेवणं आणि जोपर्यंत आपल्या आयुष्यात योग्य व्यक्ती येत नाही तोपर्यंत त्या व्यक्तीचा वापर करणं".

अनुषा दांडेकर या व्हिडीओमध्ये म्हणतेय,"माझ्यासाठी हे एक प्लेसहोल्डरसारखं आहे. तुम्ही त्या खुर्चीवर तोपर्यंत बसलेले असता, जोपर्यंत तुम्हाला एखादा चांगला पर्याय मिळत नाही. हे अगदी असंच आहे, जसं तुम्ही त्या जागेवर एखाद्या व्यक्तीला ठेवताय – ट्रिपसाठी, वाढदिवसासाठी, किंवा शारिरीक गरजेसाठी वापरताय. पण तरीसुद्धा तुम्ही अजूनही एखाद्या चांगल्या व्यक्तीच्या येण्याची वाट पाहत असता आणि म्हणता, ‘हे फक्त सिचुएशनशिप आहे’. जेव्हा तो चांगला माणूस भेटतो, तेव्हा तुम्ही ती जागा रिकामी करता आणि मग खऱ्या नात्याची सुरुवात होते. माझ्या मते, हेच सिचुएशनशिप आहे.’ अनुषा दांडेकरला सध्या प्रचंड ट्रोलिंगचा सामना करावा लागत आहे. नेटकरी म्हणत आहेत की, अनुषा करण कुंद्रासोबत कधीच खर्‍या अर्थाने सीरियस रिलेशनशिपमध्ये नव्हती आणि फक्त त्याचा उपयोग करत होती.