चक्रीवादाळाच्या तडाख्यात अडकला मराठमोळा अभिनेता, सांगितला 38 तासांचा भयानक अनुभव, हादरवणारे VIDEO VIRAL

वादळामुळे श्रीलंकेतील परिस्थिती अत्यंत बिघडली होती. सुयशने त्याच्या पोस्टमध्ये येथील स्थिती अत्यंत भयानक असल्याचे सांगितले. त्याने लिहिले होते, "काल संध्याकाळपासून कोलंबो एअरपोर्टवर अडकलो आहे. आमच्या विमानाने भारतासाठी टेक ऑफ करावं, एवढीच आशा आहे. श्रीलंकेतील परिस्थिती खूपच भयानक आहे. त्यांच्यासाठी मी प्रार्थना करतो, लवकरच सर्व ठीक होईल."

तब्बल ३८ तासांनंतर सुयश भारतात परतला आणि तेव्हा त्याने एअरपोर्टवरच्या संघर्षाची कहाणी सांगितली. "लोकांनी अक्षरशः आशा सोडली होती." या घटनेत त्याने अनोळखी लोकांना मित्र बनवले, प्रत्येकाला शांत ठेवण्याचा प्रयत्न केला आणि जबाबदाऱ्या वाटून घेतल्या.

एअरपोर्टवर प्रवाशांचा संयम सुटलेला असताना, सुयशने एक महत्त्वाचा विचार मांडला. तो म्हणाला, "आवाज चढवणे, शिवीगाळ करणे, भांडणाची सुरुवात करणे आणि तमाशा करणे हे कोणत्याही समस्येवर कधीच उपाय ठरू शकत नाहीत. ज्या लोकांना असे वाटते, त्यांनी हे त्वरित थांबवावे." अशा परिस्थितीत डोकं शांत ठेवून परिस्थिती समजून घेणे आणि माणुसकीतून इतरांची मदत करणे किती महत्त्वाचे आहे, हे त्याने आवर्जून सांगितले.

सुयशने या कठीण परिस्थितीतही मदतीसाठी उभे राहिलेल्या लोकांबद्दल कृतज्ञता व्यक्त करत म्हटले, "श्रीलंकेच्या एअरपोर्ट प्रशासनाने ज्या पद्धतीने हे प्रकरण हाताळले, त्यासाठी मी त्यांना सलाम करतो. तसेच श्रीलंकेतील भारतीय दूतावासातील अधिकाऱ्यांचे मी विशेष आभार मानतो." त्याने एअरलाइन्सच्या केटरिंग कर्मचाऱ्यांचेही कौतुक केले. तो म्हणाला, "त्यांचे स्वतःचे नातेवाईक बेपत्ता असतानाही, ते अथक परिश्रम करून प्रवाशांना घरी पाठवण्याचा प्रयत्न करत होते. त्यांना फक्त प्रवाशांचा विश्वास हवा होता."