"तो 'अ आ ई'पासून मराठी शिकला", बॉलिवूड अभिनेत्याबद्दल अभिजीत पानसे यांची स्तुतीसुमने, सांगितला 'तो' किस्सा

मुंबई: शिवसेनाप्रमुख बाळासाहेब ठाकरे हे महाराष्ट्राच्या इतिहासातील सर्वांत महत्त्वाच्या व्यक्तिमत्त्वांपैकी एक आहेत. ते मुंबईतील मराठी माणसांचा आवाज बनले होते. सामान्य माणसांपासून अगदी बड्या सेलिब्रिटींसाठी ते मोठा आधार ठरले होते.

त्यांनी फक्त मुंबई-महाराष्ट्रातील मराठी माणूसच नाही, तर देशातील हिंदूंसाठी महत्त्वाच्या गोष्टी ठामपणे केल्या. म्हणूनच त्यांना हिंदूहृदयसम्राट ही उपाधी देण्यात आली.

काही वर्षांपूर्वीच बाळासाहेबांच्या जीवनावर आधारित 'ठाकरे' हा चित्रपट रिलीज झाला होता. यामध्ये बाळासाहेबांच्या आयुष्यातील अनेक महत्त्वाच्या घटना दाखवण्यात आल्या होत्या.

या सिनेमामध्ये बॉलिवूडमधील उत्कृष्ट अभिनेता नवाझुद्दीन सिद्दीकीने बाळासाहेब यांची भूमिका साकारली होती, तर मीनाताई ठाकरे यांच्या भूमिकेत अभिनेत्री अमृता राव दिसली होती.

नुकतंच चित्रपटाचे दिग्दर्शक अभिजीत पानसे यांनी एका पॉडकास्टमध्ये एक मोठा आणि मनोरंजक खुलासा केला आहे. त्यांनी या चित्रपटाच्या निर्मितीमागची कथा, राजकारण आणि मुख्य म्हणजे अभिनेता नवाझुद्दीन सिद्दीकी याला मराठी भाषेसाठी करावी लागलेली मेहनत याबाबत अनेक गोष्टी सांगितल्या.

चित्रपटाच्या निर्मितीबद्दल बोलताना अभिजीत पानसे म्हणाले की, त्यांना सुरुवातीला संजय राऊत यांनी मराठी चित्रपटासाठी संपर्क साधला होता. पानसे म्हणाले, "जेव्हा त्यांना मराठी चित्रपट बनवायचा होता, तेव्हा मी त्यांना सांगितले की, चित्रपट बनवू, पण तो मराठीमध्ये नको. तो हिंदीत बनवला, तर जास्त लोकांपर्यंत पोहोचेल."

संजय राऊत यांनी ही सूचना मान्य केली आणि त्यांनी याबद्दल राज ठाकरे यांनाही सांगितले. राज ठाकरे यांनीही 'कर' असे म्हणून या कल्पनेला हिरवा कंदील दिला.

नवाझुद्दीन सिद्दीकी यांच्याबद्दलही पानसे यांनी सांगितले. पानसे म्हणाले की, बाळासाहेब ठाकरे यांच्यासारख्या एका महान नेत्याची भूमिका साकारताना, नवाझुद्दीन सिद्दीकी यांच्यासमोर हिंदी उच्चारांचा प्रभाव नसलेली अस्सल मराठी भाषा शिकणे हे मोठे आव्हान होते. नवाझुद्दीन यांनी स्वतः या भूमिकेबद्दलची आपली जिद्द व्यक्त केली होती.

ते म्हणाले होते, "ही भूमिका परिपूर्ण व्हावी यासाठी मी मराठी भाषा शिकण्याचा, तिचे योग्य उच्चार अवगत करण्याचा प्रयत्न करत आहे. त्यासाठी मला बाळासाहेबांचे आशीर्वाद पाठबळ देतील, असा विश्वास आहे."

नवाझुद्दीन यांची ही चिकाटी पाहून अभिजीत पानसे यांनी त्यांना चक्क 'अ आ ई इ' पासून मराठी भाषा शिकवण्यास सुरुवात केली. नवाझुद्दीन यांनी घेतलेल्या मेहनतीमुळेच पडद्यावर बाळासाहेब ठाकरे यांचा प्रभावी वावर शक्य झाला.

पानसे यांनी या पॉडकास्टमध्ये नवाझुद्दीन सिद्दीकीचे भरभरून कौतुक केले. "त्यांनी कधी बाळासाहेबांना समोरासमोर पाहिले नव्हते किंवा त्यांची भेटही घेतली नव्हती. पण त्यांनी जी मेहनत घेतली, ती आपण चित्रपटात पाहिलीच. ते खरोखरच खूप कमालीचे अभिनेते आहेत," असे पानसे म्हणाले.

पानसे यांच्या मते, एखाद्या महान नेत्याच्या आयुष्याविषयी अभिनेत्याला परिस्थिती समजावून सांगणे खूप कठीण असते, पण नवाझुद्दीन यांनी स्वतःहून घेतलेल्या मेहनतीमुळेच हा चित्रपट साकार होऊ शकला.