Eggs And Cancer : अंड्यामुळे खरंच कॅन्सर होतो का? एका दिवसात किती अंडी खाणं योग्य? तज्ज्ञांनी दिली माहिती

डॉ. मीना कुमारी यांनी सर्वप्रथम स्पष्ट केले की, अंडे हे अत्यंत पोषणतत्त्वांनी भरपूर, सुरक्षित आणि स्वस्त अन्न आहे. लहान मुले, प्रौढ तसेच रुग्णालयातील रुग्णांसाठीही अंडे रोजच्या आहाराचा महत्त्वाचा भाग ठरू शकते. त्यांनी सांगितले की, अंड्यात उच्च दर्जाचे प्रोटीन, व्हिटॅमिन A, D, E, B12, सेलेनियम आणि कोलाइन भरपूर प्रमाणात असते, जे स्नायू, इम्युनिटी आणि मेंदूच्या आरोग्यासाठी अत्यंत आवश्यक आहेत.

सोशल मीडियावर जी अफवा पसरत होती ती AOZ नावाच्या घटकाबाबत होती. डॉ. मीना यांनी स्पष्ट केले की AOZ हे प्रत्यक्षात नायट्रोफ्युरान नावाच्या अँटिबायोटिक औषधाचे मेटाबोलाइट आहे. त्यांनी ठामपणे सांगितले की भारत, युरोपियन युनियन आणि अमेरिकेत पोल्ट्री फार्मिंगमध्ये नायट्रोफ्युरानच्या वापरावर पूर्णपणे बंदी आहे. म्हणजेच अशा औषधांचा नियमित वापर होत नाही आणि अंड्यांमध्ये त्यांचे अस्तित्व असणे असामान्य आहे.

पुढे त्यांनी सांगितले की, वैज्ञानिक अभ्यास आणि मोठ्या प्रमाणातील मेटा-विश्लेषणांमधून हे स्पष्ट झाले आहे की, मर्यादित प्रमाणात अंड्यांचे सेवन आणि कॅन्सर यांच्यात कोणताही थेट संबंध नाही. कॅन्सरचा धोका प्रामुख्याने जीवनशैलीशी संबंधित असतो. जसे की धूम्रपान, लठ्ठपणा, शारीरिक निष्क्रियता आणि अतिप्रमाणात प्रोसेस्ड फूडचे सेवन. अंड्यासारख्या नैसर्गिक अन्नामुळे कॅन्सर होण्याची शक्यता नसते. डॉ. मीना यांनी स्पष्टपणे सांगितले की, निरोगी व्यक्ती रोज 1 ते 2 अंडी किंवा आठवड्यातून 7 ते 12 अंडी सुरक्षितपणे खाऊ शकतात.

डायबिटीज किंवा हृदयाशी संबंधित समस्या असलेल्या लोकांनी आपल्या स्थितीनुसार अंड्यांचे प्रमाण ठरवावे आणि डायटिशियनचा सल्ला घ्यावा. रुग्णालयांमध्येही आयसीयू, ज्येष्ठ आणि कॅन्सर रुग्णांच्या आहारात अंडी समाविष्ट केली जातात. मात्र ते नेहमी पोर्शन कंट्रोल आणि पुराव्यावर आधारित पद्धतीने दिले जाते.

डॉ. मीना कुमारी यांनी सामान्य जनतेला आवाहन केले की, सोशल मीडियावर पसरलेल्या अफवांवर विश्वास ठेवू नका. नेहमी वैज्ञानिक आणि सरकारी संस्थांनी दिलेल्या माहितीलाच प्राधान्य द्या. त्यांनी पुन्हा एकदा सांगितले की, अंडे हे सुरक्षित, पौष्टिक आणि उपयुक्त अन्न आहे. फक्त ते योग्य प्रमाणात आणि योग्य पद्धतीने शिजवून खाल्ले पाहिजे. अशा प्रकारे, डॉ. मीना यांनी अंड्यांबाबत पसरलेल्या भीतीदायक अफवांना फेटाळून लावत लोकांना हेही समजावून सांगितले की अंडे आपल्या आरोग्यासाठी किती महत्त्वाचे आणि फायदेशीर आहेत.