Bhogi Bhaji : भोगी दिवशीच का खावी मिक्स भाजी आणि तीळ लावलेल्या भाकऱ्या? तज्ज्ञांनी दिली महत्त्वाची माहिती, पाहा Video

कोल्हापूर : हिंदू संस्कृतीत कोणताही सण साजरा करताना त्या सणा दिवशी विशेष अन्नपदार्थ बनवले जातात. अशाच पद्धतीने संक्रांत सणाआधी येणाऱ्या भोगीच्या दिवशीही विशेष भोगीची भाजी बनवली जाते. त्याचबरोबर यासोबत तीळ लावलेल्या भाकरी बनवल्या जातात मात्र हे पदार्थ याच दिवशी का खाल्ले जावेत यामागे हे प्रमुख कारणे आहेत. त्याबद्दल कोल्हापूरच्या आहारतज्ज्ञांनी माहिती दिली आहे.

खरंतर मकर संक्रांत हा हिंदू सणांमधील सर्वात महत्त्वाचा सण आहे. या सणाच्या आदल्या दिवशी भोगी सण साजरा केला जातो. आनंद घेणारा किंवा आनंद उपभोगणारा असाच या भोगी शब्दाचा शब्दशः अर्थ होतो. तर या दिवशी भोगीची मिश्र भाजी आणि तीळ मिश्रीत बाजरीच्या भाकरीचा आनंद घेतला जातो. 'न खाई भोगी तो सदा रोगी' अशी म्हण ही भोगीच्या जेवणाबद्दल प्रसिद्ध आहे. यामागे कारणही तसेच आहे. या हिवाळ्याच्या दिवसात येणाऱ्या सर्व प्रकारच्या भाज्या या भोगीच्या मिक्स भाजीमध्ये वापरल्या जातात. त्यामुळेच ही भाजी सर्व प्रकारच्या घटकांनी युक्त असते, अशी माहिती कोल्हापूरच्या आहारतज्ज्ञ अमृता सूर्यवंशी यांनी दिली आहे.