जेवा आणि ताटपण खाऊन टाका; विद्यार्थ्यांनी बनवली अनोखी भांडी, खाण्यासाठी अट फक्त एकच!

इंदोर : काही पदार्थ इतके स्वादिष्ट असतात की, आपण त्यांची भांडीही चाटून पुसून खातो. बऱ्याचदा आपल्याला आपल्या आवडत्या पदार्थासोबत त्याचं ताटही चावून खावंसं वाटतं. आता लवकरच तुमची ही इच्छादेखील पूर्ण होणार आहे. होय, आता पदार्थांसोबत ताटही चावून चावून खाता येणार आहे.

मध्यप्रदेशातील इंदोर शहरात ही अनोखी भांडी तयार करण्यात आली आहेत. इंदोर हे भारतातलं सर्वात स्वच्छ शहर म्हणून ओळखलं जातं. इथल्या स्टेट इन्स्टिट्यूट ऑफ हॉटेल मॅनेजमेंटच्या विद्यार्थ्यांनी चक्क नाचणीची भांडी तयार केली आहेत. यात वाट्या, चमचे आणि लहान बश्यांचा समावेश आहे. ही भांडी बनवण्यासाठी नाचणीच्या पिठासह उडदाचं पीठ, गूळ आणि मिठाचा वापर करण्यात आलाय. महत्त्वाचं म्हणजे या भांड्यांची प्रयोगशाळेत चाचणीही झाली आहे. आता मध्यप्रदेश पर्यटन विकास बोर्डाकडून तिथल्या हॉटेलमध्ये ही भांडी वापरण्यावर विचारविनिमय सुरू आहे. येत्या काळात राजधानी दिल्लीत होणाऱ्या पर्यटन महापर्वात पहिल्यांदा नाचणीची भांडी सादर केली जातील.