पोटातले जंत मारणारा चहा; ना कोरा, ना दूधाळ, तरी लोक आवडीनं पितात!

रांची : अनेकजणांची सकाळ चहाशिवाय होतच नाही. त्यांच्यासाठी ब्रश केल्यानंतर चहा घेतला की, मग दिवस सुरू होतो. भारतात अशी क्वचितच काही घरं असतील, जिथे सकाळचा चहा बनवला जात नाही. नाहीतर जवळपास प्रत्येक घरात सकाळ आणि संध्याकाळचा चहा ठरलेलाच असतो. काहीजण तर दिवसभरात जेव्हा जेव्हा तल्लफ येईल तेव्हा तेव्हा चहा पितात. काहीजण कोरा चहा पितात, काहीजण दूधाचा पितात, तर काहीजण इतर फ्लेव्हरचा चहा पितात. पण तुम्ही कधी तांदळाच्या चहाबद्दल ऐकलंय का?

आपल्या देशाच्या एका भागात लोक दिवसाची सुरुवात तांदळाच्या चहाने करतात. हा भाग म्हणजे झारखंडची राजधानी रांची. इथं तांदळाचा चहा लोकप्रिय आहे. शिवाय तो बनवण्याची पद्धतही वेगळी आहे. यात तांदूळ महत्त्वाचे असतात, त्यासह साखर, मीठ किंवा गूळ आपण आवडीनुसार घालू शकता. यामुळे पोटाचे विकार बरे होतात असं म्हटलं जातं.