बीडमध्ये पुन्हा अमानुष हत्याकांड, 3 पुतण्यांसह 3 सुनांकडून चुलत्याचा खेळ खल्लास, कोयत्याने केले वार
- Published by:Ravindra Mane
Last Updated:
Crime in Beed: अमानुष हत्याकांडाने पुन्हा एकदा बीड जिल्हा हादरला आहे. इथं तीन पुतणे आणि तीन सुनांनी मिळून एका व्यक्तीची निर्घृण हत्या केली आहे.
आष्टी (बीड) : अमानुष हत्याकांडाने पुन्हा एकदा बीड जिल्हा हादरला आहे. इथं तीन पुतणे आणि तीन सुनांनी मिळून एका व्यक्तीची निर्घृण हत्या केली आहे. सहा जणांनी मिळून कोयते, लोखंडी पाईप आणि इतर धारदार शस्त्रांनी केलेल्या हल्ल्यात ७२ वर्षीय चुलत्याचा मृत्यू झाला आहे. सहाही जणांनी शनिवारी सायंकाळी मारहाण केली होती. रविवारी उपचारादरम्यान त्यांचा मृत्यू झाला आहे. तीन पुतणे आणि तीन सुनांनी अशाप्रकारे चुलत्याची हत्या केल्याने परिसरात एकच खळबळ उडाली आहे.
ही घटना बीड जिल्ह्याच्या आष्टी तालुक्यातील सय्यदमीर गावात घडली. छबू देवकर असं हत्या झालेल्या ७२ वर्षीय चुलत्याचं नाव आहे. या प्रकरणी सहाही आरोपींना पोलिसांनी ताब्यात घेतलं आहे. घटनेचा पुढील तपास केला जात आहे.
पोलिसांनी दिलेल्या माहितीनुसार, देवकर कुटुंबामध्ये मागील काही काळापासून शेतातील बांध आणि पाणीपुरवठा करणाऱ्या पाइपलाइनच्या कारणावरून वाद सुरू होता. शनिवारी सायंकाळी गावातील लोणी सय्यदमीर येथील छबू देवकर यांच्या घरासमोर लहान मुले चेंडू खेळत होती. याच कारणातून देवकर कुटुंबात भांडणाला सुरुवात झाली आणि त्याचे रूपांतर जोरदार हाणामारीत झाले.
advertisement
यावेळी संतप्त झालेल्या पुतण्यांनी आणि त्यांच्या पत्नींनी (सुनांनी) मिळून वृद्ध छबू देवकर यांना कोयता आणि लोखंडी पाइप यांसारख्या धारदार आणि जड शस्त्रांनी मारहाण केली. या जीवघेण्या हल्ल्यात छबू देवकर हे गंभीर जखमी झाले. त्यांना तातडीने रुग्णालयात दाखल करण्यात आले होते. मात्र, उपचार सुरू असताना त्यांचा रविवारी दुर्दैवी मृत्यू झाला.
याप्रकरणी आष्टी पोलिसांनी तातडीने सूत्रे फिरवत तिन्ही पुतण्यांसह त्यांच्या तिन्ही सुना, अशा सहा आरोपींना ताब्यात घेतले आहे. कौटुंबिक वादातून झालेल्या या खुनाच्या घटनेने लोणी सय्यदमीर गावात तणावाचे वातावरण निर्माण झाले असून, पोलीस पुढील तपास करत आहेत. शेतीच्या किरकोळ वादातून एका वृद्धाचा बळी गेल्याने गावात हळहळ व्यक्त होत आहे.
Location :
Bid,Maharashtra
First Published :
Oct 13, 2025 7:23 AM IST
मराठी बातम्या/महाराष्ट्र/बीड/
बीडमध्ये पुन्हा अमानुष हत्याकांड, 3 पुतण्यांसह 3 सुनांकडून चुलत्याचा खेळ खल्लास, कोयत्याने केले वार
