Covid Scam : सोमय्यांनी भ्रष्टाचाराचा आरोप केलेल्या आणखी एका आरोपीला जामीन, कोविड सेंटर घोटाळा प्रकरण

आगामी महापालिका निवडणुकीच्या पार्श्वभूमीवर शिवसेना ठाकरे गटासाठी हा निर्णय महत्त्वाचा असल्याची चर्चा सुरू आहे. मुंबई महापालिकेच्या कारभारावरून भाजप ठाकरे गटाविरुद्ध आक्रमक होण्याची शक्यता आहे. तर, महाविकास आघाडी सरकारच्या काळात भाजपचे माजी खासदार किरीट सोमय्या यांनी आरोपांचा धुरळा उडवत एकच खळबळ उडवून दिली होती. यामध्ये ठाकरेंच्या निकटवर्तीयांची चौकशी झाली होती. आता सुजित पाटकरांना कोर्टाने जामीन मंजूर केला आहे.  पाटकर यांना कोर्टाकडे आपला पासपोर्ट जमा करावा लागणार असून इतरही काही अटी जामिनासाठी कोर्टाने ठेवल्या आहेत.

जंबो कोविड सेंटर घोटाळा प्रकरणात अडचणीत आलेले उद्धव ठाकरे यांचे निकटवर्तीय व व्यावसायिक सुजित पाटकर यांना अखेर दोन लाखांच्या जातमुचलक्यावर न्यायालयाने जामीन मंजूर केला आहे. भाजप नेते आणि माजी खासदार किरीट सोमय्या यांनी या प्रकरणात मोठा आरोप करत 36 कोटी रुपयांच्या घोटाळ्याचा ठपका ठेवत पाटकर यांच्याविरोधात तक्रार दाखल केली होती. त्यानंतर मुंबईतील आझाद मैदान पोलीस ठाण्यात गुन्हा दाखल करण्यात आला होता आणि प्रकरणाचा तपास आर्थिक गुन्हे शाखेकडे सोपवण्यात आला.