CBSE बोर्डाचा मोठा निर्णय, आता वर्षातून दोनदा होणार दहावीची परीक्षा, नियमावली काय?

सीबीएसईच्या नव्या निर्णयानुसार प्रत्येक विद्यार्थ्याला फेब्रुवारीत होणारी बोर्ड परीक्षा देणं अनिवार्य असणार आहे. तसेच ज्या विद्यार्थ्यांना आपल्या गुणांमध्ये सुधारणा करायची आहे, असे विद्यार्थी मे महिन्यात होणारी दुसरी परीक्षा देऊ शकतात. परंतु, एका वर्षात दोन वेळा परीक्षा घेण्यात येणार असल्या तरी विद्यार्थ्याचं अंतर्गत मूल्यमापन वर्षातून एकदाच होणार आहे. हे नियम 2026 पासून लागू होणार असून नव्या नियमांबाबत विद्यार्थी आणि पालकांकडून सूचना मागवल्या जातील.

दहावी बोर्डाच्या परीक्षा 2026 पासून वर्षातून दोनदा घेतल्या जातील. परीक्षेचा पहिला टप्पा फेब्रुवारी महिन्यात तर दुसरा टप्पा मे मध्ये पार पडेल. पहिली परीक्षा अनिवार्य तर दुसरी ऐच्छिक असणार आहे. पहिल्या टप्प्यातील निकाल एफ्रिल तर दुसऱ्या टप्प्यातील जूनमध्ये जाहीर केले जातील. या निर्णयामुळे विद्यार्थ्यांना गुण सुधारण्याची संधी मिळेल. या शैक्षणिक वर्षात अंतर्गत मूल्यांकन केवळ एकदाच होणार असून दोन्ही टप्प्यांसाठी तेच लागू असेल.