GR मधले शब्द आणि वाक्यांवर आमच्या मनात शंका, काय काय खटकलं? छगन भुजबळांनी सांगितलं

मुंबई : मराठा आरक्षणाच्या मागणीसाठी आमरण उपोषणाला बसलेले मनोज जरांगे पाटील यांच्या आंदोलनावर तोडगा काढण्यासाठी राज्य सरकारने त्यांच्या काही मागण्या मान्य करून त्यासंबंधीचा शासन निर्णय त्यांच्या हाती सोपवला. मराठा समाजाच्या कुणबी दाखल्यांसाठीची प्रक्रिया सुलभ व्हावी, यासाठी प्रामुख्याने निर्णय घेण्यात आल्याची माहिती शासनाने दिली. याच शासन निर्णयावर ओबीसी नेते प्रचंड नाराज झाले आहेत. ज्येष्ठ नेते, मंत्री छगन भुजबळ यांनी तर आजच्या मंत्रिमंडळ बैठकीवरही बहिष्कार टाकला. असे असताना ओबीसी नेते बबनराव तायवाडे यांनी मात्र आरक्षणासंदर्भात काढलेल्या शासन निर्णयाचे ओबीसींचे काहीही नुकसान होणार नाही, अशी स्वतंत्र भूमिका मांडत काळजीचे कारण नसल्याचे ओबीसी बांधवांना सांगितले. मराठा समाजासाठी निघालेल्या जीआरसंदर्भात ओबीसी नेत्यांमध्येच मतमतांतरे असल्याचे स्पष्ट झाल्यानंतर छगन भुजबळ यांनी त्यांची भूमिका स्पष्ट केली.