बालविवाह रोखण्यासाठी केली चॅम्पियनची नेमणूक, छत्रपती संभाजीनगरमधील हा अनोखा उपक्रम तरी काय? 

छत्रपती संभाजीनगर : बालविवाह करणे हे कायद्याने गुन्हा आहे. मात्र, अजूनही समाजातील काही लोकांची मानसिकता बदललेली नाही, हे अनेकदा दिसून येते. अशी लोकं आपल्या मुलांचा बालविवाह करुन देतात. त्यामुळेच छत्रपती संभाजीनगर जिल्ह्यात बालविवाह रोखण्यासाठी जिल्हा परिषदेकडून चॅम्पियनशिप नेमणूक करण्यात आली आहे. हे चॅम्पियन्स कशा पद्धतीने काम करणार आहेत, याबाबत छत्रपती संभाजीनगर येथील जिल्हा परिषदेच्या महिला व बालकल्याण अधिकारी सुवर्णा जाधव यांनी महत्त्वाची माहिती दिली.

छत्रपती संभाजीनगर जिल्ह्यातील बालविवाह रोखण्यासाठी जिल्हा परिषदेच्या माध्यमिक उच्च माध्यमिक आरोग्य या सर्व विभागातील अधिकाऱ्यांची निवड करण्यात आली आहे. त्यासोबतच शहरी भागांमधील महानगरपालिका, आरोग्य विभाग, शिक्षण विभाग, जिल्हा महिला आणि बालकल्याण विकास या विभागातील सर्व अधिकारी काम करत आहेत. हे सर्व लोक यासाठी काम करणार आहेत. मार्च ते एप्रिल या महिन्यांमध्ये तब्बल 64 बालविवाह रोखण्यामध्ये यश हे आलेले आहे आणि एप्रिल ते ऑगस्ट म्हणजे आजच्या दिवसापर्यंत तब्बल 42 बालविवाह या अंतर्गत रोखण्यात आल्या आहेत.

पुढे त्यांनी सांगितले की, जेव्हा आम्हाला माहिती मिळते की कुठेही बालविवाह होणार आहे, तेव्हा आमचे सर्व चॅम्पियन्स त्या ठिकाणी जाऊन सर्व पालकांचं समूपदेशन करतात. तसेच एखादी विद्यार्थिनी शाळेमध्ये 15 दिवसापेक्षा जास्त गैरहजर राहिली असेल तर तिचा फॉलोअप घेऊन माहिती घेतात. तिचा कुठला विवाह तर होणार नाही आणि जर तिचा विवाह होणार असेल तर आमचे सर्व अधिकारी कर्मचारी त्या ठिकाणी जाऊन तिच्या पालकांना समजावून सांगतात आणि हा बालविवाह रोखणेमध्ये आम्हाला यश येते, असेही सुवर्ण जाधव यांनी सांगितले.