काय हा प्रकार? दसऱ्याला रावणाचं नाहीतर शूर्पणखेचं होतं दहन, ठिकाण माहितीये का?

छत्रपती संभाजीनगर : विजयादशमी म्हणजेच दसरा हा सण संपूर्ण भारतात मोठ्या उत्साहात साजरा केला जातो. या दिवशी रावण दहनाची परंपरा आहे. देशभरात विविध ठिकाणी रावण दहनाच्या कार्यक्रमांचे आयोजन केले जाते. पण छत्रपती संभाजीनगरमध्ये अशी एक संस्था आहे जी रावणाचं दहन न करता रावणाची बहीण शूर्पणखा दहन करते. नेमकं हे दहन का केलं जातं? याबाबत जाणून घेऊ.

छत्रपती संभाजीनगर शहरात पत्नीपीडित आश्रम ही संघटना आहे. दरवर्षी दसऱ्याला रावणाच्या पुतळ्याचं दहन न करता ते रावणाची बहीण शूर्पणखा हिचं दहन करतात. "रावणामध्ये पुरुषी अहंकार होता तो आता पूर्णपणे संपला आहे. मात्र ज्या महिला आहेत त्यांच्यामधला अहंकार त्यांचे पुरुषांवरती अत्याचार हे दिवसेंदिवस वाढत चाललेले आहेत. बिचाऱ्या पतीला पत्नी या मुद्दाम त्रास देत आहेत. याकरिता ही पत्नीपीडित संघटना रावणाचं दहन न करता शूर्पणखाचे दहन करते, असं संघटनेचे सदस्य सांगतात.