तुमच्याकडून हॉटेल बिलावर सेवा शुल्क आकारला जातोय का? कायदा काय सांगतो? कुठे कराल तक्रार?

आयोगाच्या मार्गदर्शक तत्त्वांनुसार, हॉटेलमध्ये प्रवेश करणे म्हणजे सेवा शुल्कास संमती देणे असा होत नाही. हॉटेलने आपल्या मेनू कार्ड किंवा परिसरात कुठेही सेवा शुल्क अनिवार्य असल्याचे फलक लावू नयेत. बिलात सर्विस चार्ज आकारण्यास बंदी आहे. केंद्रीय ग्राहक संरक्षण प्राधिकरणाने हॉटेल आणि रेस्टॉरंटना बिलात परस्पर सर्व्हिस चार्ज जोडण्यास पूर्णपणे मनाई केली आहे. सेवा शुल्क हे जेवणाच्या बिलाचा भाग असू शकत नाही, असे स्पष्ट निर्देश देण्यात आले आहेत.

कुठल्याही हॉटेलचा हॉटेलमालक सर्व्हिस चार्ज ऐवजी इतर कोणत्याही टोपणनावाने किंवा छुप्या पद्धतीने ग्राहकांकडून अतिरिक्त पैसे वसूल करू शकत नाहीत. बिलामध्ये केवळ जेवणाचे दर आणि लागू असलेले सरकारी कर लावण्याचीच परवानगी आहे.

हेल्पलाइन : 1800-11-4000 किंवा 1915 या क्रमांकावर कॉल करून तक्रार नोंदवू शकता, ग्राहक आयोग: जिल्हा ग्राहक विवाद निवारण आयोगाकडे लेखी तक्रार दाखल करता येते, तसेच वेबसाइट www.consumerhelpline.gov.in या पोर्टलवर ऑनलाइन तक्रार करता येते.

नियमांचे उल्लंघन करणाऱ्या हॉटेलवर ग्राहक संरक्षण कायद्यांतर्गत कडक दंडात्मक कारवाई केली जाऊ शकते. यामध्ये हॉटेलचा परवाना रद्द होण्यापासून ते ग्राहकाला नुकसान भरपाई देण्यापर्यंतच्या शिक्षेची तरतूद आहे.

तक्रार दाखल करण्यासाठी हॉटेलने दिलेले मूळ बिल आणि त्यावर आकारलेला सर्व्हिस चार्ज हा सर्वांत महत्त्वाचा पुरावा असतो. त्यामुळे पेमेंट करण्यापूर्वी आणि केल्यानंतर बिलाचा फोटो किंवा प्रत पुराव्या दाखल जपून ठेवावी.