chhatrapati sambhajinagar : स्पर्धा परिक्षेचा नाद सोडला अन् टाकली चहाची टपरी, आज महिन्याला 60 हजार रुपयांची कमाई

मनोहर आणि त्यांचा भाऊ राम हे दोघेजण स्पर्धा परीक्षेची तयारी करण्यासाठी संभाजीनगर शहरात आले. छत्रपती संभाजीनगर शहरात आल्यामुळे त्यांचा आर्थिक खर्चदेखील वाढला. या ठिकाणी एका भाड्याच्या खोलीत राहायचे. या खोलीचे भाडे म्हणून 3 हजार रुपये त्यांना द्यावे लागायचे.

मेसचा डब्बासाठीही त्यांना महिन्याला 3 हजार रुपये खर्च यायचा. त्यासोबतच लायब्ररीचा देखील त्यांना खर्च यायचा. असा त्यांचा महिन्याकाठी त्यांना एकूण 10 ते 12 हजार रुपये खर्च यायचा. एवढे पैसे त्यांना घरुन घेणे शक्य नव्हते. म्हणून त्यांनी सुरुवातीला पेपर टाकायला सुरुवात केली. त्यांनी काही दिवस लोकांच्या घरी जाऊन पेपर टाकले. त्यानंतर परत ते पेपरचा स्टॉल लावायला लागले. तिथे पण 10 वाजेपर्यंत सकाळी पेपर ते विकायचे आणि त्याच्यानंतर ते परत लायब्ररीमध्ये जाऊन अभ्यास करायचे.

त्यांनी हे साधारण 3-4 वर्षे केले. पण त्यामध्ये देखील त्यांच्या असं लक्षात आले की, एवढे कष्ट करून देखील आपल्याला यश येत नाही. स्पर्धा परीक्षांमध्ये देखील जागा निघत नव्हत्या. पेपरचे घोटाळे व्हायचे. त्यामुळे त्यांनी आता आपण स्पर्धा परीक्षा न करता काहीतरी स्वतःचा व्यवसाय करावा, असे ठरवले. यानंतर त्यांनी चहाचा व्यवसाय सुरू करण्याचा निर्णय घेतला.

आता सध्या त्यांचे दुकान हे व्यवस्थितरित्या चालत आहे. ते या ठिकाणी चहा त्यासोबत नाश्त्यासाठी पुलाव, पोहे आणि मटकी हे पदार्थ विकतात. या ठिकाणी नाश्त्यासाठी सकाळी खूप गर्दीदेखील असते. आज ते दोघेजण महिन्यासाठी 50 ते 60 हजार रुपये कमवत आहेत, असे मनोहर यांनी सांगितले. त्यांचा हा प्रवास निश्चितच प्रेरणादायी आहे.