Manoj Jarange : '...त्याला जेलमध्ये टाका', शिवरायांचा पुतळा कोसळल्यानंतर जरांगे संतापले

जालना : सिंधुदुर्गच्या राजकोट किल्ल्यावरील छत्रपती शिवाजी महाराजांचा पुतळा कोसळलाय. त्यामुळे राज्यभरात शिवप्रेमींमध्ये संतापाची लाट उसळली आहे. राज्यात पहिल्यांदाच शिवाजी महाराजांचा पुतळा कोसळण्याची घटना घडली आहे. या गंभीर मुद्यावरून विरोधकांनी आक्रमक भूमिका घेतली आहे. राजकोट किल्ल्यावरील छत्रपती शिवाजी महाराजांचा पुतळा कोसळल्यानं राज्यभरातील शिवप्रेमी संतप्त झालेत. अवघ्या 8 महिन्यात पुतळा कोसळलाय. 4 डिसेंबर 2023 रोजी पंतप्रधान नरेंद्री मोदींनी पुतळ्याचं लोकार्पण केलं होतं. पुतळ्यावर 5 कोटींचा खर्च करण्यात आला होता. पुतळा कोसळल्यामुळे संतप्त झालेले आमदार वैभव नाईक यांनी मालवण येथील सार्वजनिक बांधकाम विभागाच्या कार्यालयाची तोडफोड केली.

‘तिथे 45 किलोमीटर प्रती तास असा वारा वाहत होता, त्यामुळे पुतळ्याचं नुकसान झालं आहे. पालकमंत्री रवींद्र चव्हाण घटनास्थळी जात आहेत. नेव्हीचे अधिकारी, आमचे काही अधिकारी उद्या पाहणी करतील. छत्रपती शिवाजी महाराज आमचं आराध्य दैवत आहे, हा पुतळा आम्ही पुन्हा दिमाखात आणि मजबुतीने उभा करू. कायदा हातात घेण्याचा अधिकार कुणालाही नाही. या राज्यात शांतात राहिले पाहिजे, यासाठी सगळ्यांनी काळजी घ्यावी’, अशी प्रतिक्रिया मुख्यमंत्री एकनाथ शिंदे यांनी केली आहे.