ST BUS : चालत्या बसमध्ये एसटी ड्रायव्हरला हार्ट अटॅक, मृत्यूआधी वाचवले प्रवाशांचे प्राण, नंतर सोडला जीव

मारोती नेमाने हिंगोली तालुक्यातील संतुक पिंपरी येथील रहिवासी असून हिंगोली एसटी आगारात चालक म्हणून कार्यरत होते. आज सकाळी सहा वाजता ते मानव विकासची बस घेऊन सेनगाव धानोराला गेले. बस परत घेऊन येताना सेनगाव हिंगोली मार्गावर रिधोरा गावाजवळ छातीत तीव्र वेदना व्हायला लागल्या. त्यांनी प्रसंगावधान राखत व बसमधील प्रवाशांची काळजी करत बसचा वेग कमी करून बस रस्त्याकडेला थांबवली आणि आपले प्राण सोडले. बसच्या वाहकाने तात्काळ एसटी आगाराशी संपर्क केला व मदत मागितली. कर्मचाऱ्यांनी तात्काळ पोहोचत त्यांना रुग्णालयात दाखल केलं. परंतु, डॉक्टरांनी तपासणी करून मृत असल्याचे घोषित केले.

5 ऑगस्ट 2022 रोजी पुणे-सातारा हायवेवर एसटी बस सुसाट असताना चालकाला अचानक हृदयविकाराचा झटका आला. मात्र स्वत:चा जीव धोक्यात असताना एसटी ड्रायव्हरने प्रसंगावधान राखल्यामुळे 25 प्रवाशांचे जीव वाचले आहेत. बसला गती असतानाही त्याने कशीबशी बस बाजूला घेतली. चालकाने त्याच्यासोबत इतका मोठा प्रसंग घडला असतानाही प्रसंगावधान राखलं. बस थांबवल्यानंतर काही वेळातच चालकाचा मृत्यू झाला.