IPS Anjana Krishna: अमोल मिटकरी यांना माफी का मागावी लागली? राष्ट्रवादीचे नेते का संतापले? नेमकं काय घडलं?

मुंबई : राष्ट्रवादी काँग्रेसमध्ये फूट पडल्यानंतर अजित पवार यांची प्रतिमा ठरवून बदलण्याचा प्रयत्न केला गेला. रांगडेपणासाठी, कठोर भाषेसाठी ओळखणाऱ्या अजित पवारांच्या स्वभावात आता नम्रता, विनयशीलता आली आहे, असे ठसविण्याचा प्रयत्न राष्ट्रवादी काँग्रेसकडून करण्यात आला. पण 'स्वभावाला औषध नसते' ही म्हण अजित पवार यांनी काही महिन्यातच खरी करून दाखवली. परिविक्षाधीन अधिकारी अंजना कृष्णा यांना फोन करून 'आप की इतनी डेअरिंग हो गयी क्या?' असे मग्रुर भाषेत अजित पवार यांनी विचारले. नुकत्याच सेवेत रूजू झालेल्या अधिकाऱ्याला प्रोत्साहान द्यायचे सोडून त्यांचे खच्चीकरण करण्याचा प्रयत्न अजित पवार यांनी केला. त्यापुढे जाऊन राष्ट्रवादीतील 'चहापेक्षा किटली गरम' स्वभावाच्या प्रवक्ते नामक पदाधिकाऱ्यांनी सर्वोच्च नेत्याला खूष करण्यासाठी किंबहुना दादांच्या बचावासाठी कुणी थेट यूपीएससीला पत्र लिहिले तर कुणी थेट कृष्णा यांच्या कर्तव्यनिष्ठेवरच प्रश्नचिन्ह उपस्थित केले. प्रशासकीय कामात हस्तक्षेप केल्याप्रकरणी अजित पवार यांची कृती चुकीची मानून राज्य आणि राष्ट्रीय पातळीवरील माध्यमांनी त्यांना जोरदार लक्ष्य केले. त्यानंतर आयपीएस अधिकारी कृष्णा याच कशा दोषी आहेत? हे दाखविण्याची राष्ट्रवादीत स्पर्धा सुरू झाली.