कोल्हापुरात पुन्हा झाले मगरीचे दर्शन, नागरिक भीतीच्या छायेखाली

कोल्हापुरातील पेठवडगाव एसटी स्टँड परिसरामध्ये मोकळी जागा आहे. या जागेमध्ये इमारतीच्या बांधणीसाठी मोठमोठे खड्डे खोदलेले आहेत. या खड्ड्यांमध्ये मोठ्या प्रमाणात पाणी साठलेले असते. या खड्ड्यांपैकी एका ठिकाणी हे मगरीचे पिल्लू नागरिकांना आढळले. हे समजताच पाहणाऱ्यांची संख्या वाढली.

ही घटना नगरपालिका प्रशासनास कळविण्यात आली. सुमारे दीड महिन्यांपूर्वीही या ठिकाणी आणखी एका छोट्या पिल्लाचे दर्शन झाले होते. यामुळे या खड्ड्यात अजून मगरी असण्याची शक्यता वर्तविण्यात येत आहे. या ठिकाणी कोणताही प्रवाह नसताना, जवळ ओढा नसताना या खड्ड्यात मगरींचा वावर कसा? असा प्रश्न नागरिकांना पडला असून मगरी आल्या की कोणी आणून सोडल्या याबाबत उलट सुलट चर्चा सुरू आहे. पेठवडगावच्या मध्यवर्ती ठिकाणी मगर आल्याचे वृत्त फोटोसह समाजमाध्यमावर दिवसभर फिरत होते.

पेठवडगाव फेब्रुवारी महिन्यात पाण्याने भरलेल्या खड्ड्याच्या काठावर मगरीचे पिल्लू आढळून आले होते. याविषयी पालिका प्रशासन व वनविभागाला कळविण्यात आले होते. पण कोणतीही ठोस उपाययोजना करण्यात आली नाही. शहराच्या मध्यवस्तीत असणाऱ्या या खड्ड्यात असणाऱ्या मगरी पकडून त्यांना नैसर्गिक अधिवासात सोडण्यात यावे, असे डॉ. अशोक चौगुले, पेठवडगावचे माजी उपनगराध्यक्षांनी सांगितले आहे.