Maharashtra Elections Pune : राष्ट्रवादी पवार गटाच्या माजी नेत्याच्या कारवर अज्ञातांकडून हल्ला, कारण काय?

राष्ट्रवादी काँग्रेसच्या शरदचंद्र पवार गटाचे माजी युवा नेते सुरज वाजगे यांच्या कारवर गुरुवारी रात्री 10 च्या दरम्यान अंधाराचा फायदा घेत दोन अज्ञातांनी दगडफेक केली. या दगडफेकीत वाजगे यांच्या कारचे मोठे नुकसान झाले आहे. मात्र चालक आणि वाजगे यातून सुखरूप बचावले आहेत. सूरज वाजगे गुरुवारी रात्री जुन्नरवरून नारायणगावकडे प्रवास करत होते. त्या वेळी हा हल्ला झाला.

माजी आमदार अतुल बेनके यांचे घनिष्ट संबंध असलेले वाजगे राष्ट्रवादी काँग्रेसमध्ये फूट पडल्यावर शरदचंद्र पवार गटात सामील झाले होते. लोकसभा निवडणुकीत त्यांनी खासदार डॉ.अमोल कोल्हे यांचे काम केले होते. तर आता विधानसभा निवडणुक त्यांनी आपल्या पक्षाची साथ सोडून अपक्ष उमेदवार माजी आमदार शरद सोनवणे यांना पाठिंबा दिला होता. त्यामुळे हा हल्ला राजकीय वैमनस्स्यातुन झाल्याचे बोलले जात आहे. घटनास्थळी डॉ.अमोल कोल्हे, जुन्नरचे उपविभागीय पोलीस अधिकारी रविंद्र चौधर यांनी तातडीने भेट देऊन वाजगे यांच्या प्रकृतीची विचारपूस केली आहे. या पुढील अधिकचा तपास जुन्नर पोलीस करत आहेत.

या घटनेमुळे जुन्नरमध्ये तणावाचे वातावरण निर्माण झाले होते. आता परिस्थिती नियंत्रणात असून या हल्ल्यामागील आरोपी आणि सूत्रधार शोधून काढण्याचे आवाहन जुन्नर पोलिसांसमोर आहे.