Maharashtra Elections : महायुतीतील वादाचा भाजपला धक्का, शिवसेनेवर तोफ डागत माजी खासदाराचे बंडाचे निशाण

नंदुरबार: विधानसभा निवडणुकीच्या तोंडावर भाजपला मोठा धक्का बसला आहे. भाजपच्या माजी खासदार डॉ. हिना गावित यांनी पक्ष सदस्यत्वाचा राजीनामा दिला आहे. हिना गावित यांनी शिवसेना शिंदे गटावर आरोपांची तोफ डागत आपली अपक्ष उमेदवारी कायम असल्याचे सांगितले. हिना गावित या नंदुरबार जिल्ह्यातील अक्कलकुआ या मतदारसंघातून अपक्ष निवडणूक लढवणार आहेत. सोमवारी उमेदवारी अर्ज मागे घेण्याचा शेवटचा दिवस होता. या कालावधीत गावित यांनी अर्ज मागे घेतला नव्हता. त्यामुळे भाजप काय कारवाई करणार याकडे लक्ष लागले होते. मात्र, आज हिना गावित यांनी पक्ष सदस्यत्वाचा राजीनामा देत अपक्ष लढणार असल्याचे जाहीर केले.