Maharashtra Govt : कामगारांना दिलासा की त्रास? आता 9 तास नव्हे तर 12 तासांची ड्युटी, कायद्यात सरकारकडून बदल

मुंबई: गुंतवणूकदारांना आकर्षित करण्यासाठी आणि रोजगाराच्या संधी वाढवण्याचा दावा करत राज्यातील महायुती सरकारने कामाच्या तासांबाबत महत्त्वाचा निर्णय घेतला आहे. कारखाने अधिनियम व आस्थापन अधिनियमात महत्त्वाचे बदल केले आहेत. या निर्णयानुसार, कारखान्यातील कामगारांचे दैनंदिन कामाचे तास 9 वरून थेट 12 तासांपर्यंत वाढवले जाणार आहेत. तर दुकाने व आस्थापनांमध्ये कामाचे तास 9 वरून 10 तासांपर्यंत करण्यात येणार आहेत. महायुती सरकारने घेतलेल्या या निर्णयावर कामगार संघटनांमध्ये तीव्र संताप पसरला आहे.

कारखाने अधिनियम 1948 तील आधीच्या बदलानुसार, दैनंदिन कामाचे तास हे 9 तासांहून आता 12 तास करण्यात येणार आहे. कामांच्या तासात बदल झाल्याने विश्रांतीसाठी ब्रेक हा 5 तास 30 मिनिटांऐवजी आता 6 तास 30 मिनिटे इतका असणार आहे. ही सुधारणा फक्त २० किंवा त्यापेक्षा जास्त कामगार असलेल्या आस्थापनांवर लागू राहणार आहे. त्याशिवाय, या सुधारणांमुळे 20 पेक्षा कमी कर्मचारी असलेल्या आस्थापनांना नोंदी प्रमाणपत्र घेणे आवश्यक राहणार नाही. मात्र केवळ सूचनापत्रांन्वये व्यवसाय सुरु करण्याबाबत अवगत करणे आवश्यक राहणार आहे.

कारखान्यांमधील कामगारांना एका आठवड्यात (एक दिवसाची रजा वगळता) जास्तीतजास्त 48 तासच काम करणे बंधनकारक आहे. नव्या नियमानुसार, ही मर्यादा कायमच राहणार आहे.  याचाच अर्थ कामगारांना प्रत्येक दिवशी सरासरी 8 तास काम करणे बंधनकारक आहे. एका कारखान्यात कामगाराने 12 तास काम केले तरी त्यांना ओव्हरटाईमचा मोबदला द्यावा लागणार आहे. त्याशिवाय, एक बदली रजाही द्यावी लागणार आहे.