जरांगे पाटलांकडून छातीठोकपणे ५८ लाख नोंदींचा आकडा, तायवाडेंनी हवाच काढली, विभागवार आकडेवारी मांडली

मुंबई : गेल्या ४० वर्षांपासून महाराष्ट्रात मराठा आरक्षणाचा लढा सुरू आहे. या लढ्यात अनेकांनी बलिदान दिले. मात्र सरसकट मराठा समाजाला कुणबी दाखले मिळून ओबीसी प्रवर्गात समावेश करण्यासाठी वेळोवेळी मागासवर्ग आयोगाने तसेच सर्वोच्च न्यायालयाने देखील नकार दिला. तरीही सरसकट मराठ्यांना कुणबी दाखल्यांची मागणी करून मराठवाड्याचे पुत्र मनोज जरांगे पाटील यांनी ऐतिहासिक लढा पुकारला. आतापर्यंत जवळपास सात वेळा त्यांनी आरक्षण प्रश्नासाठी उपोषणे केली. मराठा समाजाचा प्रचंड पाठिंबा मिळत असताना जरांगे पाटील यांच्या सरकार दरबारीच्या मागण्या टप्प्याटप्प्याने बदलत गेल्या. परंतु प्रचंड मोठ्या काळानंतर राज्यातील मराठा समाजाने जरांगे पाटील यांच्यासारख्या साध्या माणसावर विश्वास टाकल्याचे मान्यच करावे लागेल. आतापर्यंतच्या आंदोलनाचे यश सांगताना जरांगे पाटील अभिमानाने ५८ लाख नोंदीचा आकडा पुढे करतात. परंतु प्रत्यक्षात त्यांच्या दाव्यात अजिबात तथ्य नसल्याचे ओबीसी बचाव समितीचे नेते बबनराव तायवाडे यांनी म्हटले आहे.