15 वर्षांपासून किर्तनसेवेचं मिळालं फळ, अविनाश महाराजांच्या देवा बैलाला संत सोपानदेव महाराज पालखी सोहळ्याचा मान

सातारा : संत ज्ञानेश्वर महाराज यांचे धाकटे बंधू संत सोपानदेव महाराज पालखी सोहळ्याचे सासवडमधून 3 जुलै रोजी सकाळी 11 वाजता सोपानदेव मंदिरातून प्रस्थान होणार आहे. या सोहळ्याच्या रथासाठी सातारा जिल्ह्यातील दुर्गम भागामधील जावली तालुक्यातील घोटेघर गावचे सुपुत्र व सुप्रसिध्द कीर्तनकार हभप अविनाश महाराज महाडिक (जावलीकर) यांच्या 'देवा' बैलाला पालखी रथ ओढण्याचा मान मिळाला आहे. त्यामुळे श्री. महाडीक व त्यांच्या देवाचे सर्व स्तरातून कौतुक होत आहे.

संतश्रेष्ठ श्री सोपानदेव महाराज पालखी सोहळा श्री क्षेत्र सासवड ते श्री क्षेत्र पंढरपूर पालखी रथासाठी महाराष्ट्रातील सुप्रसिध्द कीर्तनकार ह.भ.प.अविनाश महाराज महाडिक (जावलीकर) यांचा लाडका देवा बैल पालखी रथ ओढण्याचा मान मिळाला आहे. मेढा येथील बैलबाजारात 2022 मधील सगळ्यात मोठी विक्रमी बोली करून देवा या बैलाची महाडिक यांनी खरेदी केली होता. तोच बैल आज पालखीचा मानकरी ठरला आहे.

दरवर्षी, पालखी सोहळ्यात सहभागी होऊन पंढरपूरच्या पांडूरंगाच्या वारीला जाणाऱ्या वारकऱ्याच्या घरच्या बैलाला पालखी रथ ओढण्यासाठी मान मिळाला, यापेक्षा भगवंताची मोठी कृपा असूच शकत नाही, अशी भावना हभप अविनाश महाराज महाडीक यांनी व्यक्त केली आहे.