सर्दी, खोकल्यानं झालात हैराण?, नागवेलीचं पान आहे रामबाण उपाय, अनेक समस्यांवर फायदेशीर

सातारा : नागवेलीच्या पानाचे अनेक पारंपारिक आणि औषधी महत्त्व आहे. नागवेलीची पाने हे विविध संस्कृतीमध्ये आणि आयुर्वेदामध्ये औषधी गुणधर्मासाठी वापरली जातात. नागवेलीचे पानांना काही भागात खाऊचे पान म्हणूनही ओळखले जाते. या खाऊच्या पानांना फारसे लांब कोठे शोधण्यासाठी जावं लागत नाही. अलीकडच्या काळात अनेक जण आपल्या घराच्या बागेमध्ये किंवा कुंड्यांमध्येही या पानांचा वेल लावतात.

शेकडो, हजारो वर्षांपासून आयुर्वेदामध्ये या पानांचा औषधी गुणधर्मासाठी वापर केला जातो. लहान मुलांना सर्दी खोकला पळवून लावायचा असेल तर अनेकदा ही पानं खाण्याचा सल्ला आयुर्वेदिक तज्ञ, डॉक्टर देतात. लहान मुलांना ही पाने कशी खायला द्यावीत, याचा वापर कोणत्या उपचारावर केला जातो, तसेच याचे सेवन कसे करावे, याबाबतची माहिती आपण आज जाणून घेऊयात.

आयुर्वेदिक तज्ञ डॉ. शुभदा गुंजाळ चोखंडे यांनी याबाबत माहिती दिली. लोकल18 च्या टीमशी बोलताना त्यांनी सांगितले की, नागवेलीला काही भागात लोक खाऊची पाने म्हणून ओळखतात. या पानांना आयुर्वेदिक दृष्ट्या महत्त्व असले तरी ते शोधण्यासाठी फारसे लांब कोठे जाण्याचे आवश्यकता नाही. कारण आपणाकडे तिला धार्मिक अधिष्ठानही मिळालेले आहे. घरात कोणतीही पूजा असल्याने सर्वात प्रथम खाऊची पाने आणली जातात. त्यामुळे सहज मिळत असल्याने या पानांचा उपयोग घेता येतो. अनेक जण आता आपल्या घराच्या कुंड्यांमध्येही खाऊच्या पानांचा वेल लावून ती पाने आपल्या घरामध्ये मोठी करत आहेत.

नागवेलीची पाने म्हणजेच खाण्याचे पान किंवा विड्याचे पान आरोग्यासाठी खूप फायदेशीर आहे. जेवणानंतर पान खाण्याचे अनेकजण शौकीन असतात. त्यामुळे तोंडाची चव वाढते. पान खाल्ल्याने की तोंडातील अनेक जीवाणूंचा प्रभावीपणे सामना केला जातो. यामुळे तोंडाला दुर्गंध येत नाही. तसेच दात पोकळी, दात किडणे यांचा त्रास कमी होतो. जेवणानंतर पानाचा विडा किंवा नुसते पान चावून खाल्ल्याने आतड्या निरोगी राहतात. आरोग्यासोबतच ते सौंदर्य वाढवण्यातही फायदेशीर ठरते, असेही त्यांनी सांगितले.