त्या सहा लोकांना तुम्ही आरोपी करणार का? अंधारेंचा DYSP ना सवाल, खांबे निरुत्तर, पुन्हा पुन्हा एकच उत्तर

फलटण (सातारा) : फलटण उपजिल्हा रुग्णालयातील महिला डॉक्टरच्या मृत्यू प्रकरणी तिच्या कुटुंबियांसह सुषमा अंधारे यांनी फलटणला जाऊन तपास अधिकाऱ्यांची भेट घेतली. मात्र पोलीस स्टेशनच्या बाहेरच कित्येक वेळ अंधारे यांना अडविण्यात आले होते. अखेर त्यांनी पोलीस स्टेशनसमोर ठिय्या आंदोलन केले. त्यानंतर पोलीस उपअधीक्षक खांबे यांनी सुषमा अंधारे यांच्याशी चर्चा केली. तपासाचा भाग असलेल्या गोष्टी मी जाहीरपणे सांगू शकत नाही, यावर ते कायम राहिले. त्यावर तपासातल्या गोष्टी महिला आयोगाच्या अध्यक्षा रुपाली चाकणकर यांनी सार्वजनिकरित्या का सांगितल्या? त्यांनी मुलीचे चारित्र्यहनन का केले? अशा प्रश्नांची सरबत्ती अंधारे यांनी केली. तसेच चाकणकर यांच्या शेजारी बसलेले पोलीस अधीक्षक तुषार दोशी काहीच का बोलले नाहीत, त्यांनी चाकणकर यांना का थांबवले नाही, असेही अंधारे यांनी विचारले. त्यावर पोलीस उपअधीक्षक खांबे मात्र निरुत्तर झाले.