ST Bus: ऐन दिवाळीत ST कर्मचाऱ्यांवर संक्रांत! RTO नं कापला पगार, आता तुम्हीच सांगा चूक कुणाची?

ठाणे: ठाण्यात एसटी कर्मचाऱ्यांवर दिवाळीआधीच संक्रांत ओढवलीये. आरटीओच्या एका निर्णयामुळे 170 कर्मचाऱ्यांच्या पगाराला कात्री लागलीये. त्यामुळे ठाणे आगारातील डेपो नंबर 1 मधील कर्मचाऱ्यांमध्ये अन्याय झाल्याची भावना असून एसटी बस चालकांनी थेट परिवहन मंत्री प्रताप सरनाईकांना साकडं घातलंय.

ठाणे आगारातील डेपो नंबर 1 मध्ये काम करणाऱ्या 70 कर्मचाऱ्यांना आरटीओच्या निर्णयाचा फटका बसला आहे. आरोटीओने केलेले चलन त्यांच्या वेतनातून वसूल करण्यात आले आहे. प्रत्येकी 4 हजार 12 रुपये वेतनातून वसूल करण्यात आले आहेत. तर तब्बल 8 हजार  24 रुपये थकीत असल्याचे वेतन पत्रिकेत नमूद करण्यात आलंय. ⁠हा दंड एसटी नादुरुस्त असल्याने चाकलांच्या माथ्यावर मारण्यात आला आहे. त्यामुळे एसटी चालकांमध्ये नाराजी असून त्यांनी याबाबत परिवहन मंत्री प्रताप सरनाईक यांनी लक्ष घालावे अशी मागणी केलीये.