Uddhav Thackeray Raj Thackeray: ठाकरे बंधूंच्या युतीच्या चर्चा, काँग्रेस, पवार गटातही हालचालींना वेग, निवडणुकीत नवी समीकरणं?

मुंबई, ठाणे, नवी मुंबई, कल्याण-डोंबिवली, नाशिक आणि पुणे महापालिकेत मराठी मतदारसंघांमध्ये उद्धव-राज युती प्राधान्याने होण्याची शक्यता वर्तवली जात आहे. मात्र स्थानिक पातळीवरील नेत्यांचे मत घेऊन काही ठिकाणी मनसेसोबत आणि काही ठिकाणी महाविकास आघाडीतील घटक पक्षांसोबत आघाडी करण्याचा पर्यायही खुला ठेवण्यात येईल. राज आणि उद्धव ठाकरे एकत्र आल्यास आगामी महापालिका निवडणुका आणि राज्यातील राजकीय समीकरणे पूर्णपणे बदलू शकतात. त्याचमुळे आता विविध पर्यायांची चाचपणी महाविकास आघाडीतील घटक पक्षांकडून सुरू झाली आहे.

राज ठाकरे यांनी मागील काही काळात हिंदुत्व, परप्रांतीय, मराठीच्या मुद्यावर घेतलेल्या भूमिका या महाविकास आघाडी, इंडिया आघाडीच्या भूमिकांशी विसंगत असल्याचे दिसून आले होते. त्यामुळे आता राज ठाकरे यांच्यासोबत युती करताना उद्धव ठाकरे हे महाविकास आघाडीबाबत कोणती भूमिका घेणार, याकडे सगळ्यांचे लक्ष लागले आहे. राज ठाकरे हे महाविकास आघाडीचा भाग होणार का, याकडेही लक्ष लागले आहे. राज यांच्यासोबतच्या युतीला इंडिया आघाडी, मविआने विरोध दर्शवल्यास उद्धव ठाकरे आघाडीतून बाहेर पडू शकतात.

मुंबई, ठाणे, पुणे महापालिकांसह स्थानिक स्वराज्य संस्थांच्या निवडणुकीसाठी वेगळं समीकरण निर्माण होण्याची शक्यता आहे. या निवडणुका ठाकरे बंधू एकत्र लढवतील. तर, दुसरीकडे मविआतील घटक पक्ष काँग्रेस-राष्ट्रवादी शरद पवार गट हे आघाडीत निवडणूक लढवू शकतात. स्थानिक स्वराज्य संस्थांच्या निवडणुकीतील समीकरणे लक्षात घेता ठाकरे बंधू आणि मविआतील इतर पक्ष स्वतंत्रपणे निवडणूक लढवण्याची शक्यता आहे.